aashna na-ashna yaron ke beach

āshnā nā-āshnā yāroñ ke beach

munqasim huuñ kitnī dīvāroñ ke beach

saañs bhī lete nahīñ kyā rāste

kyā havā bhī chup hai dīvāroñ ke beach

ek bhī pahchān meñ aatī nahīñ

sūrateñ kitnī haiñ bāzāroñ ke beach

dekhnā hai kis ko hotī hai shikast

aa.ina hai ek talvāroñ ke beach

kaisī dhartī hai ki phaTtī bhī nahīñ

raqs majbūrī hai muḳhtāroñ ke beach

apnā apnā kāsa-e-ġham laa.e haiñ

hai numā.ish sī azādāroñ ke beach

hai unhī se raunaq-e-bazm-e-hayāt

phuul khilte haiñ jo añgāroñ ke beach

kyā shuā-e-mehr aatī hai kabhī

āsmāñ bar-dosh dīvāroñ ke beach

ham bhī 'at.har' 'mīr' sāhab ke tufail

sher kahte haiñ tarah-dāroñ ke beach

aashna na-ashna yaron ke beach

munqasim hun kitni diwaron ke beach

sans bhi lete nahin kya raste

kya hawa bhi chup hai diwaron ke beach

ek bhi pahchan mein aati nahin

suraten kitni hain bazaron ke beach

dekhna hai kis ko hoti hai shikast

aaina hai ek talwaron ke beach

kaisi dharti hai ki phaTti bhi nahin

raqs majburi hai muKHtaron ke beach

apna apna kasa-e-gham lae hain

hai numaish si azadaron ke beach

hai unhi se raunaq-e-bazm-e-hayat

phul khilte hain jo angaron ke beach

kya shua-e-mehr aati hai kabhi

aasman bar-dosh diwaron ke beach

hum bhi 'athar' 'mir' sahab ke tufail

sher kahte hain tarah-daron ke beach