aashna phir us sitam-ijad ka kyon kar hua

āshnā phir us sitam-ījād kā kyoñ kar huā

ai dil-e-nādāñ tū ġham meñ mubtalā kyūñkar huā

kyā adū se chal ga.ī kuchh banda-parvar aap kī

mere ghar is vaqt aanā aap kā kyūñkar huā

ho gayā kyā ro.ab-o-dāb-e-husn un kā ai ḳhudā

baat karne kā adū ko hausla kyūñkar huā

saḳhtiyāñ sahne se ho jaatā tahammul aap hī

phir mire aage bayāñ uzr-e-jafā kyūñkar huā

jab na pāmāl-e-ḳhirām-e-nāz thā ai fitna-gar

phir hamārā ab ke dil yuuñ surma sā kyūñkar huā

shoḳhiyāñ us shoḳh kī kyā kar ga.iiñ tujh meñ asar

ai dil-e-nādāñ tū itnā chulbulā kyūñkar huā

bul-havas kī sī vafādārī to maiñ ne kī na thī

phir tumhārā morid-e-jaur-o-jafā kyūñkar huā

sar mirā merī jabīn is baat kī thī mustahiq

sajda-gāh-e-ḳhalq us kā naqsh-e-pā kyūñkar huā

'lutf' se kis lutf se kahte haiñ saare aqrabā

kushta-e-nāz-e-butāñ mard-e-ḳhudā kyūñkar huā

aashna phir us sitam-ijad ka kyon kar hua

ai dil-e-nadan tu gham mein mubtala kyunkar hua

kya adu se chal gai kuchh banda-parwar aap ki

mere ghar is waqt aana aap ka kyunkar hua

ho gaya kya roab-o-dab-e-husn un ka ai KHuda

baat karne ka adu ko hausla kyunkar hua

saKHtiyan sahne se ho jata tahammul aap hi

phir mere aage bayan uzr-e-jafa kyunkar hua

jab na pamal-e-KHiram-e-naz tha ai fitna-gar

phir hamara ab ke dil yun surma sa kyunkar hua

shoKHiyan us shoKH ki kya kar gain tujh mein asar

ai dil-e-nadan tu itna chulbula kyunkar hua

bul-hawas ki si wafadari to main ne ki na thi

phir tumhaara morid-e-jaur-o-jafa kyunkar hua

sar mera meri jabin is baat ki thi mustahiq

sajda-gah-e-KHalq us ka naqsh-e-pa kyunkar hua

'lutf' se kis lutf se kahte hain sare aqraba

kushta-e-naz-e-butan mard-e-KHuda kyunkar hua