aasman aasman tha mera kab hua main zamin be-sada ye na malum tha

āsmāñ āsmāñ thā mirā kab huā maiñ zamīñ be-sadā ye na mālūm thā

is mohabbat ne toḌe haiñ ham par sitam tū bhī saudā.ī thā ye na mālūm thā

TuuTe ik taar se soz aur saaz se kitnī mushkil se joḌā thā ham ne jise

tinkā tinkā hai bikhrā vahī āshiyāñ aa.egī yuuñ balā ye na mālūm thā

terī fitrat meñ zālim hai saudāgarī terī mahfil meñ ulfat bhī biktī rahī

jhūTe va.adoñ se mere hasīñ ḳhvāb kā tū ne saudā kiyā ye na mālūm thā

pyaar tujh ko kiyā maiñ ne sachchā.ī se phir bhī ai chārāgar kyoñ kiyā ye sitam

mujh se muñh moḌ kar jā.egā chhoḌ kar tū nahīñ hai mirā ye na mālūm thā

jab bhī ham haar kar TuuT kar ro paḌe apnī qismat pe aur apne hālāt par

ik nayā azm le kar mirā hausla degā mujh ko sadā ye na mālūm thā

terī duniyā meñ yārab ye kaisā chalan kyoñ khilaunā samajhte haiñ dil ko sabhī

hogī majrūh merī javāñ-ārzū dard mil jā.egā ye na mālūm thā

mar chukā thā jahāñ meñ tū mere liye phir bhī mere ḳhayāloñ meñ zinda rahā

maiñ bhī murda sī duniyā meñ jī lūñgī yuuñ laash ban ke sadā ye na mālūm thā

merā dil jaane kyoñ bevafā dilrubā umr bhar ḳhvāb tere hī buntā rahā

tū kisī aur ke ḳhvāboñ kā ban chukā ek ta.abīr thā ye na mālūm thā

merī sāñsoñ ne mujh se baġhāvat hī kī to mirī saañs thā tū mirī ruuh bhī

tū ibādat mirī tū hī dhaḌkan mirī tū hī merā ḳhudā ye na mālūm thā

dil dhaḌaktā hai merā tire naam par merī sāñseñ bhī chaltī haiñ ehsās par

tū hī manzil mirī to mirī justujū tū mirā nāḳhudā ye na mālūm thā

be-sahārā huuñ maiñ huuñ nasīboñ jalī kitnī majbūr duniyā meñ huuñ nā-tavāñ

tū mirā to nahīñ phir bhī dil meñ to hai tū mirā aasrā ye na mālūm thā

ashk bahte rahe phir bhī hañstī rahī lab pe 'shahnāz' uf tak na maiñ lā sakī

merī sachchā.iyāñ hī mirī haiñ ḳhatā dil thā bāġhī mirā ye na mālūm thā

choT lagtī rahī hañs ke sahtī rahī lab pe 'shahnāz' uf tak na maiñ lā sakī

merī barbādiyoñ kā sabab ishq hai zindagī bevafā ye na mālūm thā

aasman aasman tha mera kab hua main zamin be-sada ye na malum tha

is mohabbat ne toDe hain hum par sitam tu bhi saudai tha ye na malum tha

TuTe ek tar se soz aur saz se kitni mushkil se joDa tha hum ne jise

tinka tinka hai bikhra wahi aashiyan aaegi yun bala ye na malum tha

teri fitrat mein zalim hai saudagari teri mahfil mein ulfat bhi bikti rahi

jhuTe wadon se mere hasin KHwab ka tu ne sauda kiya ye na malum tha

pyar tujh ko kiya main ne sachchai se phir bhi ai chaaragar kyon kiya ye sitam

mujh se munh moD kar jaega chhoD kar tu nahin hai mera ye na malum tha

jab bhi hum haar kar TuT kar ro paDe apni qismat pe aur apne haalat par

ek naya azm le kar mera hausla dega mujh ko sada ye na malum tha

teri duniya mein yarab ye kaisa chalan kyon khilauna samajhte hain dil ko sabhi

hogi majruh meri jawan-arzu dard mil jaega ye na malum tha

mar chuka tha jahan mein tu mere liye phir bhi mere KHayalon mein zinda raha

main bhi murda si duniya mein ji lungi yun lash ban ke sada ye na malum tha

mera dil jaane kyon bewafa dilruba umr bhar KHwab tere hi bunta raha

tu kisi aur ke KHwabon ka ban chuka ek tabir tha ye na malum tha

meri sanson ne mujh se baghawat hi ki to meri sans tha tu meri ruh bhi

tu ibaadat meri tu hi dhaDkan meri tu hi mera KHuda ye na malum tha

dil dhaDakta hai mera tere nam par meri sansen bhi chalti hain ehsas par

tu hi manzil meri to meri justuju tu mera naKHuda ye na malum tha

be-sahaara hun main hun nasibon jali kitni majbur duniya mein hun na-tawan

tu mera to nahin phir bhi dil mein to hai tu mera aasra ye na malum tha

ashk bahte rahe phir bhi hansti rahi lab pe 'shahnaz' uf tak na main la saki

meri sachchaiyan hi meri hain KHata dil tha baghi mera ye na malum tha

choT lagti rahi hans ke sahti rahi lab pe 'shahnaz' uf tak na main la saki

meri barbaadiyon ka sabab ishq hai zindagi bewafa ye na malum tha