aasman ishq ki azmat ke siwa bhi kuchh hai

āsmāñ 'ishq kī 'azmat ke sivā bhī kuchh hai

kyā ye sahrā mirī vahshat ke savā bhī kuchh hai

muuñd luuñ aañkh to be-kār hai sab rañg-e-jahāñ

kyā mirī chashm-e-ināyat ke sivā bhī kuchh hai

kuchh to hai jis ke batāne se huuñ qāsir lekin

ab tire dard meñ lazzat ke sivā bhī kuchh hai

merī āñkhoñ se koī us kā sarāpā dekhe

tab khulegā ki qayāmat ke sivā bhī kuchh hai

har ta'alluq kisī qīmat kā talab-gār nahīñ

dil ke saude meñ tijārat ke sivā bhī kuchh hai

haañ vo ik lamha ki haq-goī pe gardan kaT jaa.e

yā'nī tā-'umr 'ibādat ke sivā bhī kuchh hai

husn sab husn-e-tabī.at pe hai mauqūf 'nadīm'

yā kahīñ husn-e-tabī.at ke sivā bhī kuchh hai

aasman 'ishq ki 'azmat ke siwa bhi kuchh hai

kya ye sahra meri wahshat ke sawa bhi kuchh hai

mund lun aankh to be-kar hai sab rang-e-jahan

kya meri chashm-e-inayat ke siwa bhi kuchh hai

kuchh to hai jis ke batane se hun qasir lekin

ab tere dard mein lazzat ke siwa bhi kuchh hai

meri aankhon se koi us ka sarapa dekhe

tab khulega ki qayamat ke siwa bhi kuchh hai

har ta'alluq kisi qimat ka talab-gar nahin

dil ke saude mein tijarat ke siwa bhi kuchh hai

han wo ek lamha ki haq-goi pe gardan kaT jae

ya'ni ta-'umr 'ibaadat ke siwa bhi kuchh hai

husn sab husn-e-tabiat pe hai mauquf 'nadim'

ya kahin husn-e-tabiat ke siwa bhi kuchh hai