aasman ke ghar mein hum khiDkiyan banate the

āsmāñ ke ghar meñ ham khiḌkiyāñ banāte the

chāñd aur sūraj ke darmiyāñ banāte the

ik qalam se bachpan meñ rangte the dīvāreñ

ik qalam se peḌoñ par pattiyāñ banāte the

kuchh yatīm bachchoñ kī aah ko ikaTThā kar

mere shahr ke mutrib siskiyāñ banāte the

jab shikam na bhartā thā sirf ThanDe paanī se

bhuuk gūñdh kar ham kuchh roTiyāñ banāte the

log us zamāna ke jhiil ik banā kar phir

ḳhāmushī se meñDak aur machhliyāñ banāte the

ḳhud-kushī kī chāhat meñ zindagī se bach kar ham

ābshār kī ḳhātir khā.iyāñ banāte the

log jin ko pahle se hī nasīb thā dozaḳh

ḳhuld jaane vāloñ kī sīḌhiyāñ banāte the

raat qabr se apnī laash khīñchne ko ham

haDDiyoñ ke malbe se rassiyāñ banāte the

aasman ke ghar mein hum khiDkiyan banate the

chand aur suraj ke darmiyan banate the

ek qalam se bachpan mein rangte the diwaren

ek qalam se peDon par pattiyan banate the

kuchh yatim bachchon ki aah ko ikaTTha kar

mere shahr ke mutrib siskiyan banate the

jab shikam na bharta tha sirf ThanDe pani se

bhuk gundh kar hum kuchh roTiyan banate the

log us zamana ke jhil ek bana kar phir

KHamushi se meinDak aur machhliyan banate the

KHud-kushi ki chahat mein zindagi se bach kar hum

aabshaar ki KHatir khaiyan banate the

log jin ko pahle se hi nasib tha dozaKH

KHuld jaane walon ki siDhiyan banate the

raat qabr se apni lash khinchne ko hum

haDDiyon ke malbe se rassiyan banate the