aasman mein chand taron ke siwa kuchh bhi nahin

āsmāñ meñ chāñd tāroñ ke sivā kuchh bhī nahīñ

in ujāloñ meñ rakhā kyā hai bhalā kuchh bhī nahīñ

maiñ zamīñ aur āsmāñ ke biich meñ maujūd huuñ

mere andar bas ḳhalā hai aur bachā kuchh bhī nahīñ

zindagī bhī dekhiye bas rā.egāñ guzrī miirī

umr to guzrī magar mujh ko milā kuchh bhī nahīñ

kaun huuñ maiñ kyā huuñ āḳhir kyā haqīqat hai mirī

sochtā huuñ sochne kā fā.eda kuchh bhī nahīñ

maiñ ne har andāz se parkhā hai merī ziist ko

ḳhvāhishoñ ke ek jañgal ke sivā kuchh bhī nahīñ

ghar meñ phailī hai tirī bhīnī sī ḳhushbū har jagah

bikhre panne haiñ magar in par likhā kuchh bhī nahīñ

uTh rahī hai har taraf jalte sharāroñ kī fasīl

zindagī aur maut kā ye mas.ala kuchh bhī nahīñ

aasman mein chand taron ke siwa kuchh bhi nahin

in ujalon mein rakha kya hai bhala kuchh bhi nahin

main zamin aur aasman ke bich mein maujud hun

mere andar bas KHala hai aur bacha kuchh bhi nahin

zindagi bhi dekhiye bas raegan guzri meri

umr to guzri magar mujh ko mila kuchh bhi nahin

kaun hun main kya hun aaKHir kya haqiqat hai meri

sochta hun sochne ka faeda kuchh bhi nahin

main ne har andaz se parkha hai meri zist ko

KHwahishon ke ek jangal ke siwa kuchh bhi nahin

ghar mein phaili hai teri bhini si KHushbu har jagah

bikhre panne hain magar in par likha kuchh bhi nahin

uTh rahi hai har taraf jalte shararon ki fasil

zindagi aur maut ka ye masala kuchh bhi nahin