aasman par hain sitare dard ki aaghosh mein

āsmāñ par haiñ sitāre dard kī āġhosh meñ

aur zamīñ par ġham hamāre dard kī āġhosh meñ

saath sūraj ke samundar meñ safīne kī tarah

Dūbte haiñ sab nazāre dard kī āġhosh meñ

raqs karte pyaar ke sho.aloñ pe haavī hai thakan

chīḳh uTThe haiñ sharāre dard kī āġhosh meñ

sar paTaktī karvaTeñ letī machaltī bār-bār

mauj hai dariyā kināre dard kī āġhosh meñ

merī āñkhoñ meñ haiñ aañsū is tarah Thahre hue

Dal meñ hoñ jaise shikāre dard kī āġhosh meñ

ashk kī sūrat haiñ mahfūz aañkh meñ yādeñ tirī

tairte manzar haiñ saare dard kī āġhosh meñ

ai mire pyāre muhāfiz tū ijāzat de to umr

kaaT duuñ tere sahāre dard kī āġhosh meñ

yuuñ utartā hai mire ehsās meñ lahje kā karb

lafz hoñ jaise tumhāre dard kī āġhosh meñ

chhā.ī hai chehre pe 'sīmā' is tarah pazhmurdagī

jaise hoñ saare ke saare dard kī āġhosh meñ

aasman par hain sitare dard ki aaghosh mein

aur zamin par gham hamare dard ki aaghosh mein

sath suraj ke samundar mein safine ki tarah

Dubte hain sab nazare dard ki aaghosh mein

raqs karte pyar ke shoalon pe hawi hai thakan

chiKH uTThe hain sharare dard ki aaghosh mein

sar paTakti karwaTen leti machalti bar-bar

mauj hai dariya kinare dard ki aaghosh mein

meri aankhon mein hain aansu is tarah Thahre hue

Dal mein hon jaise shikare dard ki aaghosh mein

ashk ki surat hain mahfuz aankh mein yaaden teri

tairte manzar hain sare dard ki aaghosh mein

ai mere pyare muhafiz tu ijazat de to umr

kaT dun tere sahaare dard ki aaghosh mein

yun utarta hai mere ehsas mein lahje ka karb

lafz hon jaise tumhaare dard ki aaghosh mein

chhai hai chehre pe 'sima' is tarah pazhmurdagi

jaise hon sare ke sare dard ki aaghosh mein