aasmanon se ja mila hun main

āsmānoñ se jā milā huuñ maiñ

aao dafnā do mar chukā huuñ maiñ

ġhaur se dekhiye mirī vahshat

saa.e saa.e se Dar rahā huuñ maiñ

zindagī ab mujhe ijāzat de

dekh jiine ko mar rahā huuñ maiñ

hañstā rahtā huuñ ik umiid pe maiñ

aise hañsne pe ro rahā huuñ maiñ

kaise jītegā ye jahāñ mujh se

Dar se aage kā marhala huuñ maiñ

dauḌ le jitnā dauḌ saktī hai

zindagī āḳhirī vabā huuñ maiñ

saarī samtoñ kī dekh kar hālat

ik na.ī samt chal paḌā huuñ maiñ

thak gayā sunte sunte maut kā shor

is liye khul ke jī rahā huuñ maiñ

is qadar Dar hai tum ko khone kā

tum ko paane se Dar rahā huuñ maiñ

aasmanon se ja mila hun main

aao dafna do mar chuka hun main

ghaur se dekhiye meri wahshat

sae sae se Dar raha hun main

zindagi ab mujhe ijazat de

dekh jine ko mar raha hun main

hansta rahta hun ek umid pe main

aise hansne pe ro raha hun main

kaise jitega ye jahan mujh se

Dar se aage ka marhala hun main

dauD le jitna dauD sakti hai

zindagi aaKHiri waba hun main

sari samton ki dekh kar haalat

ek nai samt chal paDa hun main

thak gaya sunte sunte maut ka shor

is liye khul ke ji raha hun main

is qadar Dar hai tum ko khone ka

tum ko pane se Dar raha hun main