aate nahin ho KHwab mein tarsate ho mujhe

aate nahīñ ho ḳhvāb meñ tarsāte ho mujhe

ummīd kī salīb pe laTkāte ho mujhe

furqat ke roz ek qayāmat guzar ga.ī

ab hashr ke visāl se bahlāte ho mujhe

tum bhūlte nahīñ ho sa'ī bhī karūñ agar

hai din nahīñ koī ki na yaad aate ho mujhe

zaḳhmī kiyā hai 'ishq ne hī bārhā mujhe

phir bhī junūn-e-'ishq pe uksāte ho mujhe

kartā huuñ guftugū maiñ ḳhayāloñ meñ roz hī

apne hī bas ḳhayāl meñ uljhāte ho mujhe

Dartā huuñ dil kī baat huvaidā na ho kahīñ

jab kuchh kahe baġhair hī pā jaate ho mujhe

chāra hai mere dard kā mā'dūmī hī faqat

phir kyoñ fanā kī raah se bhaTkāte ho mujhe

aate nahin ho KHwab mein tarsate ho mujhe

ummid ki salib pe laTkate ho mujhe

furqat ke roz ek qayamat guzar gai

ab hashr ke visal se bahlate ho mujhe

tum bhulte nahin ho sa'i bhi karun agar

hai din nahin koi ki na yaad aate ho mujhe

zaKHmi kiya hai 'ishq ne hi barha mujhe

phir bhi junun-e-'ishq pe uksate ho mujhe

karta hun guftugu main KHayalon mein roz hi

apne hi bas KHayal mein uljhate ho mujhe

Darta hun dil ki baat huwaida na ho kahin

jab kuchh kahe baghair hi pa jate ho mujhe

chaara hai mere dard ka ma'dumi hi faqat

phir kyon fana ki rah se bhaTkate ho mujhe