aatish-e-gul hun nigahon mein sharar rakhti hun

ātish-e-gul huuñ nigāhoñ meñ sharar rakhtī huuñ

apne andāz maiñ duniyā se digar rakhtī huuñ

ḳhaak jis din se uḌaa.ī hai havāoñ ne mirī

mausamoñ ke bhī taqāzoñ pe nazar rakhtī huuñ

ġhair-mumkin hai ki vo mujh ko bhulā deñge kabhī

jism kī baat nahīñ dil pe asar rakhtī huuñ

mujh tak aane hī nahīñ detā hai shāmat koī

sahn meñ apne jo ik būḌhā shajar rakhtī huuñ

dasht lipTā hai mire paañv se gulshan ke liye

ābloñ meñ bhī bahāroñ kā hunar rakhtī huuñ

shams aatā hai jagāne ko mujhe khiḌkī se

apnī palkoñ pe maiñ imkān-e-sahar rakhtī huuñ

nuur chhalkegā nā kyoñ 'sāhiba' ġhazloñ se mirī

maiñ kahīñ ashk kahīñ ḳhūn-e-jigar rakhtī huuñ

aatish-e-gul hun nigahon mein sharar rakhti hun

apne andaz main duniya se digar rakhti hun

KHak jis din se uDai hai hawaon ne meri

mausamon ke bhi taqazon pe nazar rakhti hun

ghair-mumkin hai ki wo mujh ko bhula denge kabhi

jism ki baat nahin dil pe asar rakhti hun

mujh tak aane hi nahin deta hai shamat koi

sahn mein apne jo ek buDha shajar rakhti hun

dasht lipTa hai mere panw se gulshan ke liye

aablon mein bhi bahaaron ka hunar rakhti hun

shams aata hai jagane ko mujhe khiDki se

apni palkon pe main imkan-e-sahar rakhti hun

nur chhalkega na kyon 'sahiba' ghazlon se meri

main kahin ashk kahin KHun-e-jigar rakhti hun