aatish-e-ishq hui sard nafasat aai

ātish-e-'ishq huī sard nafāsat aa.ī

baa'd muddat ke mire qalb ko rāhat aa.ī

aaj phir us ne mujhe zor se DāñTā lekin

aaj phir yaad mujhe us kī zarūrat aa.ī

us kī qurbat se nikalne kā ḳhayāl aayā jab

us kī phir yaad mujhe tarz-e-nadāmat aa.ī

bhūlne kī jo tujhe maiñ ne kabhī koshish kī

yād-e-māzī kī mujhe pesh mohabbat aa.ī

tujh ko dekhā jo kisī ġhair se milte-julte

yuuñ lagā jaise mire dil pe qayāmat aa.ī

sahn-e-gulshan pe paḌīñ jab se nigāheñ merī

gul-badan yaad mujhe aap kī rangat aa.ī

hasrat-e-dīd hai tūfān machā.e dil meñ

kaañp uTThā hai badan ruuh meñ shiddat aa.ī

aatish-e-'ishq hui sard nafasat aai

ba'd muddat ke mere qalb ko rahat aai

aaj phir us ne mujhe zor se DanTa lekin

aaj phir yaad mujhe us ki zarurat aai

us ki qurbat se nikalne ka KHayal aaya jab

us ki phir yaad mujhe tarz-e-nadamat aai

bhulne ki jo tujhe main ne kabhi koshish ki

yaad-e-mazi ki mujhe pesh mohabbat aai

tujh ko dekha jo kisi ghair se milte-julte

yun laga jaise mere dil pe qayamat aai

sahn-e-gulshan pe paDin jab se nigahen meri

gul-badan yaad mujhe aap ki rangat aai

hasrat-e-did hai tufan machae dil mein

kanp uTTha hai badan ruh mein shiddat aai