aatish-e-mai se charagh-e-husn raushan ho gaya

ātish-e-mai se charāġh-e-husn raushan ho gayā

aab is tasvīr se chehre ko roġhan ho gayā

yaar ke nazzāra-e-ruḳhsār kā haa.el hai ḳhat

tīra-baḳhtī se hamārī ḳhizr rahzan ho gayā

dūd-e-gardūñ sho.ala ḳhur ātish shafaq aḳhgar nujūm

ālam-e-bālā mirī aahoñ se gulḳhan ho gayā

aah vo dil jis ko labbaik-e-haram se aar thā

ishq meñ ik but ke nāqūs-e-barahman ho gayā

har shajar naḳhl-e-shahīdāñ rauza-ḳhvāñ har andalīb

ek gul ban mujh ko mātam-ḳhāna gulshan ho gayā

bazm-e-qātil meñ milā thā sar kaTāne kā mazā

jumla-tan maiñ sham.a ke mānind gardan ho gayā

kyoñ safar se aa ke tū rū-posh hai rashk-e-bahār

aib kyā gar arġhavāñ kā phuul sausan ho gayā

ik tire dil ko nahīñ tāsīr mutlaq ai parī

varna jab ātish meñ rakkhā mom aahan ho gayā

is qadar dūd-e-jigar se mere vaañ kājal jamā

band mātam-ḳhāne kā har ek rauzan ho gayā

nāznīn-e-rūh ko kyūñkar na aar aa.e bhalā

kis qadar musta.amal apnā jāma-e-tan ho gayā

khaa.ī jab Thokar tire vahshī ko dam yaad aa gayā

us ko har ik sang-e-rah sañg-e-falāḳhan ho gayā

sīna-e-ahbāb par paḌtā hai apnā har qadam

sair ke qābil nahīñ ye baaġh madfan ho gayā

kal jo 'nāsiḳh' ne 'shahīdī' ko pinhāyā pairahan

nā-tavānī se garebāñ tauq-e-gardan ho gayā

aatish-e-mai se charagh-e-husn raushan ho gaya

aab is taswir se chehre ko roghan ho gaya

yar ke nazzara-e-ruKHsar ka hael hai KHat

tira-baKHti se hamari KHizr rahzan ho gaya

dud-e-gardun shoala KHur aatish shafaq aKHgar nujum

aalam-e-baala meri aahon se gulKHan ho gaya

aah wo dil jis ko labbaik-e-haram se aar tha

ishq mein ek but ke naqus-e-barahman ho gaya

har shajar naKHl-e-shahidan rauza-KHwan har andalib

ek gul ban mujh ko matam-KHana gulshan ho gaya

bazm-e-qatil mein mila tha sar kaTane ka maza

jumla-tan main shama ke manind gardan ho gaya

kyon safar se aa ke tu ru-posh hai rashk-e-bahaar

aib kya gar arghawan ka phul sausan ho gaya

ek tere dil ko nahin tasir mutlaq ai pari

warna jab aatish mein rakkha mom aahan ho gaya

is qadar dud-e-jigar se mere wan kajal jama

band matam-KHane ka har ek rauzan ho gaya

naznin-e-ruh ko kyunkar na aar aae bhala

kis qadar mustamal apna jama-e-tan ho gaya

khai jab Thokar tere wahshi ko dam yaad aa gaya

us ko har ek sang-e-rah sang-e-falaKHan ho gaya

sina-e-ahbab par paDta hai apna har qadam

sair ke qabil nahin ye bagh madfan ho gaya

kal jo 'nasiKH' ne 'shahidi' ko pinhaya pairahan

na-tawani se gareban tauq-e-gardan ho gaya