aatish-e-ranj-o-alam sail-e-bala samne hai

ātish-e-ranj-o-alam sail-e-balā sāmne hai

paikar-e-ḳhāk meñ hone kī sazā sāmne hai

sho’la-e-jāñ hai mirā aur havā sāmne hai

zindagī jalva-numā hai ki qazā sāmne hai

har taraf DhūñDne vaalo ise dekho to sahī

vo kahīñ aur nahīñ hai ba-ḳhudā sāmne hai

mun'akis huuñ maiñ zamāne meñ zamāna mujh meñ

ḳhud bhī ā.īna huuñ aur ‘aks-numā sāmne hai

laġhzish-e-pā-e-tamanna kā bhī imkān nahīñ

jāda-e-shauq meñ gar us kī razā sāmne hai

kyā ḳhabar kaun sā jalva hai pas-e-parda-e-ġhaib

jis taraf dekhiye ik raaz nayā sāmne hai

phir vahī soz-e-darūñ merā vahī ġhaflat-e-jāñ

phir vahī sā'at-e-tajdīd-e-vafā sāmne hai

mujhe nāmūs-e-ġham-e-'ishq hai māne' varna

chārāgar baiThe haiñ pahlū meñ davā sāmne hai

apne baare meñ na khā 'ismat-e-yūsuf kī qasam

pahle ye dekh to le chāk-e-qabā sāmne hai

ham bhalā kaun se suqrāt-e-zamāñ haiñ jo 'zahīr'

roz ik zahr bharā jaam nayā sāmne hai

aatish-e-ranj-o-alam sail-e-bala samne hai

paikar-e-KHak mein hone ki saza samne hai

sho’la-e-jaan hai mera aur hawa samne hai

zindagi jalwa-numa hai ki qaza samne hai

har taraf DhunDne walo ise dekho to sahi

wo kahin aur nahin hai ba-KHuda samne hai

mun'akis hun main zamane mein zamana mujh mein

KHud bhi aaina hun aur ‘aks-numa samne hai

laghzish-e-pa-e-tamanna ka bhi imkan nahin

jada-e-shauq mein gar us ki raza samne hai

kya KHabar kaun sa jalwa hai pas-e-parda-e-ghaib

jis taraf dekhiye ek raaz naya samne hai

phir wahi soz-e-darun mera wahi ghaflat-e-jaan

phir wahi sa'at-e-tajdid-e-wafa samne hai

mujhe namus-e-gham-e-'ishq hai mane' warna

chaaragar baiThe hain pahlu mein dawa samne hai

apne bare mein na kha 'ismat-e-yusuf ki qasam

pahle ye dekh to le chaak-e-qaba samne hai

hum bhala kaun se suqraat-e-zaman hain jo 'zahir'

roz ek zahr bhara jam naya samne hai