aatishin lahr na barfab mein rakkhi jae

ātishīñ lahr na barfāb meñ rakkhī jaa.e

shab ġhunūda mire ā'sāb meñ rakkhī jaa.e

jis ke kirdār parindoñ kī tarah uḌte hoñ

vo kahānī mire asbāb meñ rakkhī jaa.e

ġhār-dar-ġhār bhaTakte hue maiñ chīḳh uThā

raushnī ab kisī mehrāb meñ rakkhī jaa.e

aañkh lag jaa.e tirī chāñd kī lorī sun kar

phir tirī niiñd mire ḳhvāb meñ rakkhī jaa.e

itnā āsān nahīñ merā junūnī honā

terī tasvīr bhī mahtāb meñ rakkhī jaa.e

jis jagah phuul ke bhī pankh hoñ titlī kī tarah

aañkh us qarya-e-shādāb meñ rakkhī jaa.e

dhuup jab mashk liye utre to māyūs na ho

chashm-e-girya koī tālāb meñ rakkhī jaa.e

aatishin lahr na barfab mein rakkhi jae

shab ghunuda mere aa'sab mein rakkhi jae

jis ke kirdar parindon ki tarah uDte hon

wo kahani mere asbab mein rakkhi jae

ghaar-dar-ghaar bhaTakte hue main chiKH uTha

raushni ab kisi mehrab mein rakkhi jae

aankh lag jae teri chand ki lori sun kar

phir teri nind mere KHwab mein rakkhi jae

itna aasan nahin mera jununi hona

teri taswir bhi mahtab mein rakkhi jae

jis jagah phul ke bhi pankh hon titli ki tarah

aankh us qarya-e-shadab mein rakkhi jae

dhup jab mashk liye utre to mayus na ho

chashm-e-girya koi talab mein rakkhi jae