aatishin sailab mein jab ruh Dali jaegi

ātishīñ sailāb meñ jab ruuh Daalī jā.egī

tishnagī sadiyoñ kī ashkoñ se bujhā lī jā.egī

TūTtī dīvār kā saaya badan kī aabrū

jaane kab mere yaqīñ kī ḳhush-ḳhayālī jā.egī

tū ne bhī jhuTlā diyā harf-e-tafakkur kā vajūd

ab mirī āvāz kis jholī meñ Daalī jā.egī

iztirāb-e-jāñ hisār-e-sañg-bārī tañg kar

jism kī tahzīb zaḳhmoñ se ujālī jā.egī

āftāboñ kī basīrat sat.h par bedār hai

kis tarah ye vus.at-e-hastī khañgālī jā.egī

zulmat-e-shab ne jo Tapkā.ī hai merī ruuh par

vo amānat kaise sūraj se sañbhālī jā.egī

shahr meñ bedār kyoñ haiñ ḳhāk-o-ḳhūñ kī āñdhiyāñ

ye agar pūchhoge sachchā.ī chhupā lī jā.egī

DhūñDne ā.eñgī jab mujh ko mirī parchhā.iyāñ

muntashir majrūh jismoñ se duā lī jā.egī

shahr meñ baḌh jā.eñgī 'parvāz' jab pābandiyāñ

raushnī āñkhoñ kī muTThī meñ dabā lī jā.egī

aatishin sailab mein jab ruh Dali jaegi

tishnagi sadiyon ki ashkon se bujha li jaegi

TuTti diwar ka saya badan ki aabru

jaane kab mere yaqin ki KHush-KHayali jaegi

tu ne bhi jhuTla diya harf-e-tafakkur ka wajud

ab meri aawaz kis jholi mein Dali jaegi

iztirab-e-jaan hisar-e-sang-bari tang kar

jism ki tahzib zaKHmon se ujali jaegi

aaftabon ki basirat sath par bedar hai

kis tarah ye wusat-e-hasti khangali jaegi

zulmat-e-shab ne jo Tapkai hai meri ruh par

wo amanat kaise suraj se sanbhaali jaegi

shahr mein bedar kyon hain KHak-o-KHun ki aandhiyan

ye agar puchhoge sachchai chhupa li jaegi

DhunDne aaengi jab mujh ko meri parchhaiyan

muntashir majruh jismon se dua li jaegi

shahr mein baDh jaengi 'parwaz' jab pabandiyan

raushni aankhon ki muTThi mein daba li jaegi