aawara bu-e-gul ki tarah hain chaman se dur

āvāra bū-e-gul kī tarah haiñ chaman se duur

laġhzīda-pā nahīñ haiñ magar ham vatan se duur

tārīk rāstoñ meñ bichhāte haiñ raushnī

aise bhī kuchh charāġh jale anjuman se duur

jis ne nasīm-e-sub.h ko baḳhshī hai tāzgī

ḳhushbū vo kis qadar hai pareshāñ chaman se duur

vo log jin kā ḳhuun hai rang-e-bahār meñ

rakkhā gayā hai un ko hī sehn-e-chaman se duur

sang-e-asās hone ke ehsās ne hameñ

ab tak rakhā hai lazzat-e-tash.hīr-e-fan se duur

ab us ko kyā kaheñ vahī fankār-e-vaqt hai

jo shaḳhs asr-e-nau meñ hai meyār-e-fan se duur

aawara bu-e-gul ki tarah hain chaman se dur

laghzida-pa nahin hain magar hum watan se dur

tarik raston mein bichhate hain raushni

aise bhi kuchh charagh jale anjuman se dur

jis ne nasim-e-subh ko baKHshi hai tazgi

KHushbu wo kis qadar hai pareshan chaman se dur

wo log jin ka KHun hai rang-e-bahaar mein

rakkha gaya hai un ko hi sehn-e-chaman se dur

sang-e-asas hone ke ehsas ne hamein

ab tak rakha hai lazzat-e-tashhir-e-fan se dur

ab us ko kya kahen wahi fankar-e-waqt hai

jo shaKHs asr-e-nau mein hai meyar-e-fan se dur