aawargan-e-ishq ko isko KHabar kahan

āvārgān-e-ishq ko is kī ḳhabar kahāñ

hotī hai un ko shaam kahāñ aur sahar kahāñ

aaya abhī hai ashkoñ meñ ḳhūn-e-jigar kahāñ

puurī huī murād tirī chashm-e-tar kahāñ

ka.aba kahāñ hai dair kahāñ ye ḳhabar kahāñ

le jaa.e mujh ko dekhiye ab rāhbar kahāñ

anjām-e-ishq par hai hamārī nazar kahāñ

laale paḌeñge jaan ke ye thī ḳhabar kahāñ

sajde kī jā haiñ dair-o-haram āstān-e-yār

ab itnā dekhnā hai ki jhuktā hai sar kahāñ

aa.egī lauT kar shab-e-ishrat na phir kabhī

ye lutf rāt-bhar kā hai vaqt-e-sahar kahāñ

saaqī tahī na jaam de behosh maiñ nahīñ

piine ko maiñ ne pī hai magar is qadar kahāñ

hairat se dekhtā huuñ haram ko maiñ baar baar

laa.ī tirī talāsh mujhe khīñch kar kahāñ

kaahe ko aap aa.e the rindoñ meñ shaiḳh jī

ab be-piye janāb yahāñ hai mafar kahāñ

ai ġham-nasīb dil tujhe taskīn kyā maiñ duuñ

ye raat hai firāq kī is kī sahar kahāñ

ḳhāna-ḳharāb ho ga.e ulfat meñ jin kī ham

ab pūchhte vahī haiñ tumhārā hai ghar kahāñ

bahlā.e tujh ko kaun mire be-qarār dil

rahtā huuñ apne hosh meñ do do pahar kahāñ

pās-e-adab se tum se kahūñ kyā maiñ ai kalīm

behosh aise hote haiñ ahl-e-nazar kahāñ

maiñ to har ek shart mohabbat kī maan luuñ

qaa.em raheñge aap kisī baat par kahāñ

kahiye vo vaqt kyā huā Dhalne lagī hai dhuup

ab vo shabāb-o-husn kī hai dopahar kahāñ

vaa.iz hai do ghaḌī kā faqat shaġhl-e-mai-kashī

miltī hai mujh ko piine ko āThoñ pahar kahāñ

dil bhī hai zad pe aur jigar bhī hai sāmne

paḌte haiñ aa ke dekhiye tīr-e-nazar kahāñ

baaqī nigāh-e-yār ne rakkhā hai kyā yahāñ

dhuñdle se kuchh nishān haiñ qalb-o-jigar kahāñ

ruḳhsat shabāb kyā huā āñdhī utar ga.ī

vo josh vo ḳharosh vo ab shor-o-shar kahāñ

soz-e-darūñ kā haal maiñ kaise bayāñ karūñ

mere bajā havās haiñ ai chārāgar kahāñ

taqdīr ke sivā ise sayyād kyā kaheñ

kholī kahāñ thī aañkh rahe umr-bhar kahāñ

muddat huī hai tuur pe chhā.ī hai ḳhāmushī

jalve vo ab kahāñ haiñ vo ahl-e-nazar kahāñ

ye dair ye haram hai ye hai āstān-e-yār

ai dil hai kyā salāh jhukā.ūñ maiñ sar kahāñ

din meñ hai dilkashī na maza koī raat meñ

'ishrat' vo ab shabāb ke shām-o-sahar kahāñ

aawargan-e-ishq ko is ki KHabar kahan

hoti hai un ko sham kahan aur sahar kahan

aaya abhi hai ashkon mein KHun-e-jigar kahan

puri hui murad teri chashm-e-tar kahan

kaba kahan hai dair kahan ye KHabar kahan

le jae mujh ko dekhiye ab rahbar kahan

anjam-e-ishq par hai hamari nazar kahan

lale paDenge jaan ke ye thi KHabar kahan

sajde ki ja hain dair-o-haram aastan-e-yar

ab itna dekhna hai ki jhukta hai sar kahan

aaegi lauT kar shab-e-ishrat na phir kabhi

ye lutf raat-bhar ka hai waqt-e-sahar kahan

saqi tahi na jam de behosh main nahin

pine ko main ne pi hai magar is qadar kahan

hairat se dekhta hun haram ko main bar bar

lai teri talash mujhe khinch kar kahan

kahe ko aap aae the rindon mein shaiKH ji

ab be-piye janab yahan hai mafar kahan

ai gham-nasib dil tujhe taskin kya main dun

ye raat hai firaq ki is ki sahar kahan

KHana-KHarab ho gae ulfat mein jin ki hum

ab puchhte wahi hain tumhaara hai ghar kahan

bahlae tujh ko kaun mere be-qarar dil

rahta hun apne hosh mein do do pahar kahan

pas-e-adab se tum se kahun kya main ai kalim

behosh aise hote hain ahl-e-nazar kahan

main to har ek shart mohabbat ki man lun

qaem rahenge aap kisi baat par kahan

kahiye wo waqt kya hua Dhalne lagi hai dhup

ab wo shabab-o-husn ki hai dopahar kahan

waiz hai do ghaDi ka faqat shaghl-e-mai-kashi

milti hai mujh ko pine ko aaThon pahar kahan

dil bhi hai zad pe aur jigar bhi hai samne

paDte hain aa ke dekhiye tir-e-nazar kahan

baqi nigah-e-yar ne rakkha hai kya yahan

dhundle se kuchh nishan hain qalb-o-jigar kahan

ruKHsat shabab kya hua aandhi utar gai

wo josh wo KHarosh wo ab shor-o-shar kahan

soz-e-darun ka haal main kaise bayan karun

mere baja hawas hain ai chaaragar kahan

taqdir ke siwa ise sayyaad kya kahen

kholi kahan thi aankh rahe umr-bhar kahan

muddat hui hai tur pe chhai hai KHamushi

jalwe wo ab kahan hain wo ahl-e-nazar kahan

ye dair ye haram hai ye hai aastan-e-yar

ai dil hai kya salah jhukaun main sar kahan

din mein hai dilkashi na maza koi raat mein

'ishrat' wo ab shabab ke sham-o-sahar kahan