aawaz ka uski zer-o-bam kuchh yaad raha kuchh bhul gae

āvāz kā us kī zer-o-bam kuchh yaad rahā kuchh bhuul ga.e

kitnā dilkash thā merā sanam kuchh yaad rahā kuchh bhuul ga.e

kis darja hasīñ thā vo lamha jo qissa-e-pārīna hai ab

jab us kī nazar meñ the bas ham kuchh yaad rahā kuchh bhuul ga.e

go aise lamhe kam aa.e lekin haiñ vo merā sarmāya

kab kab vo huā mā.il-ba-karam kuchh yaad rahā kuchh bhuul ga.e

vo rūThne aur manāne kā ehsās abhī tak baaqī hai

kyā kyā the us ke qaul-o-qasam kuchh yaad rahā kuchh bhuul ga.e

vo ḳhvāb dikhātā thā mujh ko maiñ is pe bharosa kartā thā

qaa.im na rahā va.adoñ kā bharam kuchh yaad rahā kuchh bhuul ga.e

aa.e ho abhī jaate ho kahāñ is kā ye kahnā abhī aayā

kar denā mirī phir naak meñ dam kuchh yaad rahā kuchh bhuul ga.e

ye bhūlī-bisrī yādeñ haiñ sarmāya-e-zīst mirā 'barqī'

kis tarah karūñ meñ is ko raqam kuchh yaad rahā kuchh bhuul ga.e

aawaz ka us ki zer-o-bam kuchh yaad raha kuchh bhul gae

kitna dilkash tha mera sanam kuchh yaad raha kuchh bhul gae

kis darja hasin tha wo lamha jo qissa-e-parina hai ab

jab us ki nazar mein the bas hum kuchh yaad raha kuchh bhul gae

go aise lamhe kam aae lekin hain wo mera sarmaya

kab kab wo hua mail-ba-karam kuchh yaad raha kuchh bhul gae

wo ruThne aur manane ka ehsas abhi tak baqi hai

kya kya the us ke qaul-o-qasam kuchh yaad raha kuchh bhul gae

wo KHwab dikhata tha mujh ko main is pe bharosa karta tha

qaim na raha wadon ka bharam kuchh yaad raha kuchh bhul gae

aae ho abhi jate ho kahan is ka ye kahna abhi aaya

kar dena meri phir nak mein dam kuchh yaad raha kuchh bhul gae

ye bhuli-bisri yaaden hain sarmaya-e-zist mera 'barqi'

kis tarah karun mein is ko raqam kuchh yaad raha kuchh bhul gae