aaya hun baDi dur se bigDi ko banane

aaya huuñ baḌī duur se bigḌī ko banāne

biite hue ayyām kā afsāna sunāne

matlab na tirī bazm se hai aur na tujh se

aaya huuñ faqat tishnagi-e-zauq bujhāne

ro detī thiiñ āñkheñ tirī kal tak mire ġham meñ

kyā baat hai kyoñ aaj lage aañkh churāne

kyoñ merī tamannāoñ ko pāmāl kiyā hai

kyoñ tark-e-mohabbat ke tarāshe haiñ bahāne

kyoñ ahd-e-mohabbat ko farāmosh kiyā hai

kyā bhuul ga.e tum ko vo rangīn zamāne

tū merī taraf dekh maiñ nādān huuñ kitnā

rūThī huī taqdīr ko aaya huuñ manāne

ab kar ke jafā.eñ hameñ nāshād karoge

jab ham bhī na hoñge to bahut yaad karoge

aaya hun baDi dur se bigDi ko banane

bite hue ayyam ka afsana sunane

matlab na teri bazm se hai aur na tujh se

aaya hun faqat tishnagi-e-zauq bujhane

ro deti thin aankhen teri kal tak mere gham mein

kya baat hai kyon aaj lage aankh churane

kyon meri tamannaon ko pamal kiya hai

kyon tark-e-mohabbat ke tarashe hain bahane

kyon ahd-e-mohabbat ko faramosh kiya hai

kya bhul gae tum ko wo rangin zamane

tu meri taraf dekh main nadan hun kitna

ruThi hui taqdir ko aaya hun manane

ab kar ke jafaen hamein nashad karoge

jab hum bhi na honge to bahut yaad karoge