aaya tha apni zist mein ek aisa bab bhi

aaya thā apnī ziist meñ ik aisā baab bhī

thā ḳhvāb apne sāmne tābīr-e-ḳhvāb bhī

aane se us ke phail ga.ī chār-sū mahak

jaise ki khil ga.e hoñ saman aur gulāb bhī

maiñ kyā batā.ūñ kitnā hasīñ lag rahā thā vo

hairat se tak rahā thā use māhtāb bhī

sun kar mirā savāl use chup sī lag ga.ī

mujh ko hī sochnā paḌā us kā javāb bhī

kis tarah bhuul jā.ūñ maiñ us ko jo mere paas

ḳhushbū bhī apnī chhoḌ gayā aur kitāb bhī

'kāshif' rasā.ī us talak āsān hai kahāñ

koh-e-girāñ hai raah meñ aur phir chanāb bhī

aaya tha apni zist mein ek aisa bab bhi

tha KHwab apne samne tabir-e-KHwab bhi

aane se us ke phail gai chaar-su mahak

jaise ki khil gae hon saman aur gulab bhi

main kya bataun kitna hasin lag raha tha wo

hairat se tak raha tha use mahtab bhi

sun kar mera sawal use chup si lag gai

mujh ko hi sochna paDa us ka jawab bhi

kis tarah bhul jaun main us ko jo mere pas

KHushbu bhi apni chhoD gaya aur kitab bhi

'kashif' rasai us talak aasan hai kahan

koh-e-giran hai rah mein aur phir chanab bhi