aazar-o-jafa-e-paiham se ulfat mein jinhen aaram nahin

āzār-o-jafā-e-paiham se ulfat meñ jinheñ ārām nahīñ

vo jiite haiñ lekin un ko marne ke sivā kuchh kaam nahīñ

aflāk kī gardish se dam-bhar duniyā meñ hameñ ārām nahīñ

vo din nahīñ vo ab raat nahīñ vo sub.h nahīñ vo shaam nahīñ

kyuuñ ham ne mohabbat kī un se diqqat meñ phañse zahmat meñ phañse

āġhāz hī meñ dil meñ kahtā thā achchhā us kā anjām nahīñ

is kā bhī alam us kā bhī qalaq ye ġham bhī hameñ vo ġham bhī hameñ

jiine ko ġhanīmat samjhe the jiine meñ magar ārām nahīñ

gulshan meñ ḳhizāñ ab aa pahuñchī mai-ḳhāne meñ jī kyuuñ kar bahle

vo rañg nahīñ vo lutf nahīñ vo daur nahīñ vo jaam nahīñ

har saañs se aatī hai ye sadā marne ke liye tayyār raho

jiine se nahīñ kuchh dilchaspī jiine se hameñ kuchh kaam nahīñ

qātil ko ye samjhā de koī naale se fuġhāñ se shevan se

bismil na karūñ maiñ ai 'bismil' to bismil merā naam nahīñ

aazar-o-jafa-e-paiham se ulfat mein jinhen aaram nahin

wo jite hain lekin un ko marne ke siwa kuchh kaam nahin

aflak ki gardish se dam-bhar duniya mein hamein aaram nahin

wo din nahin wo ab raat nahin wo subh nahin wo sham nahin

kyun hum ne mohabbat ki un se diqqat mein phanse zahmat mein phanse

aaghaz hi mein dil mein kahta tha achchha us ka anjam nahin

is ka bhi alam us ka bhi qalaq ye gham bhi hamein wo gham bhi hamein

jine ko ghanimat samjhe the jine mein magar aaram nahin

gulshan mein KHizan ab aa pahunchi mai-KHane mein ji kyun kar bahle

wo rang nahin wo lutf nahin wo daur nahin wo jam nahin

har sans se aati hai ye sada marne ke liye tayyar raho

jine se nahin kuchh dilchaspi jine se hamein kuchh kaam nahin

qatil ko ye samjha de koi nale se fughan se shewan se

bismil na karun main ai 'bismil' to bismil mera nam nahin