aazmaish imtihan isar tak jaana paDa

āzmā.ish imtihāñ īsār tak jaanā paḌā

jāñ-nisārī ko razā-e-yār tak jaanā paḌā

zindagānī kī hadoñ ke paar tak jaanā paḌā

chāhne vāloñ ko āḳhir daar tak jaanā paḌā

āgahī ko bas usūl-e-yār tak jaanā paḌā

be-ḳhudī ko ehtirāman daar tak jaanā paḌā

ġhuncha-e-gul ko bahāreñ pesh karne ke liye

bāġhbāñ ko sarhadoñ ke paar tak jaanā paḌā

ho chukā bīmār-e-ġham jab har davā se lā-ilāj

chārāgar ko ḳhud dil-e-bīmār tak jaanā paḌā

ḳhushbuoñ kī jab se ulfat chhoḌ baiThā bāġhbāñ

ḳhushbuoñ ko kūcha-o-bāzār tak jaanā paḌā

vaqt ke munsif kī dekho to karam-farmā.iyāñ

shahsavāroñ ko bhī dasht-e-ḳhār tak jaanā paḌā

nāz-bardārī ġhazal kī ham suḳhan-var kyā kareñ

'mīr' ko to sāya-e-dīvār tak jaanā paḌā

aazmaish imtihan isar tak jaana paDa

jaan-nisari ko raza-e-yar tak jaana paDa

zindagani ki hadon ke par tak jaana paDa

chahne walon ko aaKHir dar tak jaana paDa

aagahi ko bas usul-e-yar tak jaana paDa

be-KHudi ko ehtiraman dar tak jaana paDa

ghuncha-e-gul ko bahaaren pesh karne ke liye

baghban ko sarhadon ke par tak jaana paDa

ho chuka bimar-e-gham jab har dawa se la-ilaj

chaaragar ko KHud dil-e-bimar tak jaana paDa

KHushbuon ki jab se ulfat chhoD baiTha baghban

KHushbuon ko kucha-o-bazar tak jaana paDa

waqt ke munsif ki dekho to karam-farmaiyan

shahsawaron ko bhi dasht-e-KHar tak jaana paDa

naz-bardari ghazal ki hum suKHan-war kya karen

'mir' ko to saya-e-diwar tak jaana paDa