aazmane zist ki jab talKHiyan aa jaengi

āzmāne ziist kī jab talḳhiyāñ aa jā.eñgī

rū-ba-rū saarī hamārī ḳhāmiyāñ aa jā.eñgī

shart ye hai aap ke hāthoñ sajā.eñ gul-dān meñ

phuul kāġhaz ke bhī hoñ to titliyāñ aa jā.eñgī

be-zabāñ rahne kā saarā lutf hī kho jā.egā

zad meñ āvāzoñ ke jab ḳhāmoshiyāñ aa jā.eñgī

suukh jā.eñge samundar jab bhī bāhar ke kabhī

ghar meñ mere hasratoñ kī machhliyāñ aa jā.eñgī

chilchilātī dhuup meñ vo jab bhī ā.eñge nazar

ek pal meñ shahr meñ phir sardiyāñ aa jā.eñgī

aañkh meñ mahbūb kī shiddat se dekho jhāñk kar

shā.irī kī sab tumheñ bārīkiyāñ aa jā.eñgī

yaad kar ke vasl ke pal kaaT leñge zindagī

darmiyāñ jab bhī hamāre dūriyāñ aa jā.eñgī

asl meñ to tab hī hogā 'shoḳh' us kā imtihāñ

sāmne jab pyaar ke majbūriyāñ aa jā.eñgī

aazmane zist ki jab talKHiyan aa jaengi

ru-ba-ru sari hamari KHamiyan aa jaengi

shart ye hai aap ke hathon sajaen gul-dan mein

phul kaghaz ke bhi hon to titliyan aa jaengi

be-zaban rahne ka sara lutf hi kho jaega

zad mein aawazon ke jab KHamoshiyan aa jaengi

sukh jaenge samundar jab bhi bahar ke kabhi

ghar mein mere hasraton ki machhliyan aa jaengi

chilchilati dhup mein wo jab bhi aaenge nazar

ek pal mein shahr mein phir sardiyan aa jaengi

aankh mein mahbub ki shiddat se dekho jhank kar

shairi ki sab tumhein barikiyan aa jaengi

yaad kar ke wasl ke pal kaT lenge zindagi

darmiyan jab bhi hamare duriyan aa jaengi

asl mein to tab hi hoga 'shoKH' us ka imtihan

samne jab pyar ke majburiyan aa jaengi