aazurda ho gaya wo KHaridar be-sabab

āzurda ho gayā vo ḳharīdār be-sabab

dil bech kar huā maiñ gunahgār be-sabab

maiñ ne to us se aañkh laḌā.ī nahīñ kabhī

abrū ne mujh pe khīñchī hai talvār be-sabab

maiñ ne balā.eñ bhī nahīñ liiñ zulf-e-yār kī

maiñ ho gayā balā-e-giraftār be-sabab

bosa kabhī liyā nahīñ gul se ezaar kā

kyuuñ dil ke aable meñ chubhā ḳhaar be-sabab

kyuuñ uTh khaḌe hue vo bhalā maiñ ne kyā kahā

pahlū meñ baiTh kar hue bezār be-sabab

pūchhe to koī kyā mire taqsīr kyā gunāh

kartā hai kyuuñ sitam vo sitamgār be-sabab

ik raat bhī hañsā nahīñ us sham.a-rū se maiñ

aañsū mire gale ke hue haar be-sabab

kis din do-chār nargisī āñkhoñ se maiñ huā

is ishq ne kiyā mujhe bīmār be-sabab

jo un kī baat hai vo laḌakpan ke saath hai

iqrār be-jahat hai to inkār be-sabab

phāhā jagah kī daaġh kā shāyad sarak gayā

ye chashm-e-tar nahīñ hai sharar-bār be-sabab

dikhlā kī ye bahār shagūfa phulā.enge

oḌhā nahīñ do-shāla-e-gulnār be-sabab

nikle the mujh par aaj vo talvār bāñdh kar

rahgīr kushta ho ga.e do-chār be-sabab

aamad nahīñ kisī kī to kyuuñ jāgte ho 'bahr'

rahtā hai shab ko koī bhī bedār be-sabab

aazurda ho gaya wo KHaridar be-sabab

dil bech kar hua main gunahgar be-sabab

main ne to us se aankh laDai nahin kabhi

abru ne mujh pe khinchi hai talwar be-sabab

main ne balaen bhi nahin lin zulf-e-yar ki

main ho gaya bala-e-giraftar be-sabab

bosa kabhi liya nahin gul se ezar ka

kyun dil ke aable mein chubha KHar be-sabab

kyun uTh khaDe hue wo bhala main ne kya kaha

pahlu mein baiTh kar hue bezar be-sabab

puchhe to koi kya mere taqsir kya gunah

karta hai kyun sitam wo sitamgar be-sabab

ek raat bhi hansa nahin us shama-ru se main

aansu mere gale ke hue haar be-sabab

kis din do-chaar nargisi aankhon se main hua

is ishq ne kiya mujhe bimar be-sabab

jo un ki baat hai wo laDakpan ke sath hai

iqrar be-jahat hai to inkar be-sabab

phaha jagah ki dagh ka shayad sarak gaya

ye chashm-e-tar nahin hai sharar-bar be-sabab

dikhla ki ye bahaar shagufa phulaenge

oDha nahin do-shaala-e-gulnar be-sabab

nikle the mujh par aaj wo talwar bandh kar

rahgir kushta ho gae do-chaar be-sabab

aamad nahin kisi ki to kyun jagte ho 'bahr'

rahta hai shab ko koi bhi bedar be-sabab