ab aa bhi jao ki sham-o-sahar khule hue hain

ab aa bhī jaao ki shām-o-sahar khule hue haiñ

tumhāre vāste āñkhoñ ke dar khule hue haiñ

vo māhtāb abhī tak nahīñ khulā ham par

abhī to rang bahut muḳhtasar khule hue haiñ

khule hue haiñ jahānoñ ke dar usī jānib

tire jamāl ke daftar jidhar khule hue haiñ

tū mere sāmne aayā to aise lagtā hai

hazāroñ aa.ine pesh-e-nazar khule hue haiñ

unheñ samajhne meñ ye mas.ala bhī hai darpesh

vo log mujh pe bahut muḳhtasar khule hue haiñ

uThā rahā huuñ maiñ lazzat safar kī har lamha

mire vujūd pe kitne safar khule hue haiñ

sazā.eñ sahne se Darte nahīñ haiñ ahl-e-junūñ

hamārī jaan pe vahshat ke dar khule hue haiñ

qafas se dekh rahe haiñ bas āsmāñ 'adnān'

parind qaid haiñ aur bāl-o-par khule hue haiñ

vo mere paas bhī hai aur paas hai bhī nahīñ

tazād kaise ye ‘adnān-asar' khule hue haiñ

ab aa bhi jao ki sham-o-sahar khule hue hain

tumhaare waste aankhon ke dar khule hue hain

wo mahtab abhi tak nahin khula hum par

abhi to rang bahut muKHtasar khule hue hain

khule hue hain jahanon ke dar usi jaanib

tere jamal ke daftar jidhar khule hue hain

tu mere samne aaya to aise lagta hai

hazaron aaine pesh-e-nazar khule hue hain

unhen samajhne mein ye masala bhi hai darpesh

wo log mujh pe bahut muKHtasar khule hue hain

uTha raha hun main lazzat safar ki har lamha

mere wujud pe kitne safar khule hue hain

sazaen sahne se Darte nahin hain ahl-e-junun

hamari jaan pe wahshat ke dar khule hue hain

qafas se dekh rahe hain bas aasman 'adnan'

parind qaid hain aur baal-o-par khule hue hain

wo mere pas bhi hai aur pas hai bhi nahin

tazad kaise ye ‘adnan-asar' khule hue hain