ab aao surud-e-gham sunaen

ab aao surūd-e-ġham sunā.eñ

sotī huī ruuh ko jagā.eñ

ajzā-e-hayāt muntashir haiñ

ā.īn-e-hayāt kyā banā.eñ

ho jā.ūñ maiñ zindagī se bezār

itnā bhī na aap āzmā.eñ

bujhne ko hai sham-e-zindagānī

kyā aap ko hāl-e-dil sunā.eñ

maiñ ḳhūgar-e-dard ho chalā huuñ

achchhā hai ki aap ab na aa.eñ

ishrat ke fareb khāne vaale

jiinā hai agar to ġham uThā.eñ

majbūr-e-yaqīn-e-va.ada huuñ maiñ

ai 'hosh' vo aa.eñ yā na aa.eñ

ab aao surud-e-gham sunaen

soti hui ruh ko jagaen

ajza-e-hayat muntashir hain

aain-e-hayat kya banaen

ho jaun main zindagi se bezar

itna bhi na aap aazmaen

bujhne ko hai sham-e-zindagani

kya aap ko haal-e-dil sunaen

main KHugar-e-dard ho chala hun

achchha hai ki aap ab na aaen

ishrat ke fareb khane wale

jina hai agar to gham uThaen

majbur-e-yaqin-e-wada hun main

ai 'hosh' wo aaen ya na aaen