اب آر پار دھیان کی مشعل کہاں ہے زیبؔ

اب آر پار دھیان کی مشعل کہاں ہے زیبؔ

گنجان درد کا مرے اندر دھواں ہے زیبؔ

گاڑے سیاہ میں ہے لہو کی لپک نہ لہر

کیوں اس قدر بھی نقش نفس بے نشاں ہے زیبؔ

کیوں بے اثر ہے میری دعا صحن صبح میں

کیوں شب کدے میں میری فغاں رائیگاں ہے زیبؔ

کیوں مٹھی بھر سراب سے نقصان دشت ہے

کیوں آنکھ بھر نمی سے چمن کا زیاں ہے زیبؔ

کیوں بادباں پہ بوجھ ہے اک بوند اوس بھی

کس آب ناتواں میں سفینہ رواں ہے زیبؔ

کیوں بار بار مجھ سے بچھڑتا ہے کون ہے

کیوں موڑ موڑ میرے لئے امتحاں ہے زیبؔ

کیوں ایک خواب روز کی نیندوں پہ ہے محیط

کیوں اک ورق ہی میرے لئے داستاں ہے زیبؔ

اب ارض شش جہت ہے نہ دریائے ہفت موج

مسمار آنکھ میں عدم آسماں ہے زیبؔ

تا عمر تیرے نام سے لکھوں غزل غزل

اک درد مشترک کا سخن درمیاں ہے زیبؔ