ab aar-par dhyan ki mashal kahan hai zeb

ab ār-pār dhyān kī mash.al kahāñ hai 'zeb'

gunjān dard kā mire andar dhuāñ hai 'zeb'

gaaḌe siyāh meñ hai lahū kī lapak na lahr

kyuuñ is qadar bhī naqsh-e-nafas be-nishāñ hai 'zeb'

kyuuñ be-asar hai merī duā sahn-e-sub.h meñ

kyuuñ shab-kade meñ merī fuġhāñ rā.egāñ hai 'zeb'

kyuuñ muTThī-bhar sarāb se nuqsān-e-dasht hai

kyuuñ āñkh-bhar namī se chaman kā ziyāñ hai 'zeb'

kyoñ bādbāñ pe bojh hai ik buuñd os bhī

kis āb-e-nā-tavāñ meñ safīna ravāñ hai 'zeb'

kyoñ baar baar mujh se bichhaḌtā hai kaun hai

kyoñ moḌ moḌ mere liye imtihāñ hai 'zeb'

kyoñ ek ḳhvāb roz kī nīñdoñ pe hai muhīt

kyoñ ik varaq hī mere liye dāstāñ hai 'zeb'

ab arz-e-shash-jihat hai na dariyā-e-haft-mauj

mismār aañkh meñ 'adam-e-āsmāñ hai 'zeb'

tā-umr tere naam se likkhūñ ġhazal ġhazal

ik dard-e-mushtarak kā suḳhan darmiyāñ hai 'zeb'

ab aar-par dhyan ki mashal kahan hai 'zeb'

gunjaan dard ka mere andar dhuan hai 'zeb'

gaDe siyah mein hai lahu ki lapak na lahr

kyun is qadar bhi naqsh-e-nafas be-nishan hai 'zeb'

kyun be-asar hai meri dua sahn-e-subh mein

kyun shab-kade mein meri fughan raegan hai 'zeb'

kyun muTThi-bhar sarab se nuqsan-e-dasht hai

kyun aankh-bhar nami se chaman ka ziyan hai 'zeb'

kyon baadban pe bojh hai ek bund os bhi

kis aab-e-na-tawan mein safina rawan hai 'zeb'

kyon bar bar mujh se bichhaDta hai kaun hai

kyon moD moD mere liye imtihan hai 'zeb'

kyon ek KHwab roz ki nindon pe hai muhit

kyon ek waraq hi mere liye dastan hai 'zeb'

ab arz-e-shash-jihat hai na dariya-e-haft-mauj

mismar aankh mein 'adam-e-asman hai 'zeb'

ta-umr tere nam se likkhun ghazal ghazal

ek dard-e-mushtarak ka suKHan darmiyan hai 'zeb'