ab apne aapko KHud se chhupa raha hun main

ab apne aap ko ḳhud se chhupā rahā huuñ maiñ

bahut shadīd masā.ib meñ mubtalā huuñ maiñ

ye dhuup chhāñv ke mausam ye gardish-e-daurāñ

kahīñ pe ḳhatm huā huuñ kahīñ bachā huuñ maiñ

kabhī bhī mujh ko mayassar nahīñ huā dariyā

to tishnagī tujhe apnā banā rahā huuñ maiñ

mire qarīb na aa.egā terī yaad kā nuur

diyā jo dil meñ thā raushan bujhā rahā huuñ maiñ

kabhī laboñ pe tabassum kā nuur rahtā thā

ab apnī āñkhoñ se dariyā bahā rahā huuñ maiñ

maiñ rāh-e-haq kā musāfir mirā nasīb hai ye

ḳhud apne ḳhuun se maqtal sajā rahā huuñ maiñ

ye raat din kā tasalsul bhī ek jaadū hai

kahīñ añdherā banā huuñ kahīñ ziyā huuñ maiñ

agar maiñ chāhūñ bhī ḳhud ko manā nahīñ saktā

ḳhud apne aap se is darja ab ḳhafā huuñ maiñ

'vasīm' apne muqaddar kī ye kahānī hai

kahīñ laboñ kī ḳhamoshī kahīñ sadā huuñ maiñ

ab apne aap ko KHud se chhupa raha hun main

bahut shadid masaib mein mubtala hun main

ye dhup chhanw ke mausam ye gardish-e-dauran

kahin pe KHatm hua hun kahin bacha hun main

kabhi bhi mujh ko mayassar nahin hua dariya

to tishnagi tujhe apna bana raha hun main

mere qarib na aaega teri yaad ka nur

diya jo dil mein tha raushan bujha raha hun main

kabhi labon pe tabassum ka nur rahta tha

ab apni aankhon se dariya baha raha hun main

main rah-e-haq ka musafir mera nasib hai ye

KHud apne KHun se maqtal saja raha hun main

ye raat din ka tasalsul bhi ek jadu hai

kahin andhera bana hun kahin ziya hun main

agar main chahun bhi KHud ko mana nahin sakta

KHud apne aap se is darja ab KHafa hun main

'wasim' apne muqaddar ki ye kahani hai

kahin labon ki KHamoshi kahin sada hun main