ab apne dida-o-dil ka bhi etibar nahin

ab apne dīda-o-dil kā bhī e'tibār nahīñ

usī ko pyaar kiyā jis ke dil meñ pyaar nahīñ

nahīñ ki mujh ko tabī'at pe iḳhtiyār nahīñ

har ek jaam se pī luuñ vo bāda-ḳhvār nahīñ

har ek gaam pe kāñToñ kī haiñ kamīñ-gāheñ

shabāb aah shagūfoñ kī rahguzār nahīñ

bharī huī hai vo kām-o-dahan meñ talḳhī-e-zīst

ki lab pe jām-e-mohabbat bhī ḳhush-gavār nahīñ

na mere ashkoñ se dāman pe tere aa.egī aañch

ye sho.ala-rū haiñ magar fitrat-e-sharār nahīñ

kahīñ chhupā.e se chhuptī bhī hai haqīqat-e-ġham

vo ġham hī kyā jo masarrat se āshkār nahīñ

maiñ terī yaad se bahkā chukā huuñ yuuñ dil ko

ki ab mujhe tirī furqat bhī nāgavār nahīñ

mire sukūñ ke liye kyuuñ ye koshish-e-paiham

qarār chhīnñe vaale tujhe qarār nahīñ

jahān-e-aql ke nafrat-kadoñ meñ baT jaatā

hazār shukr mohabbat pe iḳhtiyār nahīñ

kisī kī luuT ke rāhat ḳhushī nahīñ miltī

ḳhizāñ ke haath meñ sarmāya-e-bahār nahīñ

nigāh-e-dost ko is kī bhī hai ḳhabar lekin

vo raaz jis kā abhī dil bhī rāzdār nahīñ

tavajja-e-nigah-e-yār kā sabab mā'lūm

dil-e-girafta-e-'mullā' abhī shikār nahīñ

ab apne dida-o-dil ka bhi e'tibar nahin

usi ko pyar kiya jis ke dil mein pyar nahin

nahin ki mujh ko tabi'at pe iKHtiyar nahin

har ek jam se pi lun wo baada-KHwar nahin

har ek gam pe kanTon ki hain kamin-gahen

shabab aah shagufon ki rahguzar nahin

bhari hui hai wo kaam-o-dahan mein talKHi-e-zist

ki lab pe jam-e-mohabbat bhi KHush-gawar nahin

na mere ashkon se daman pe tere aaegi aanch

ye shoala-ru hain magar fitrat-e-sharar nahin

kahin chhupae se chhupti bhi hai haqiqat-e-gham

wo gham hi kya jo masarrat se aashkar nahin

main teri yaad se bahka chuka hun yun dil ko

ki ab mujhe teri furqat bhi nagawar nahin

mere sukun ke liye kyun ye koshish-e-paiham

qarar chhinne wale tujhe qarar nahin

jahan-e-aql ke nafrat-kadon mein baT jata

hazar shukr mohabbat pe iKHtiyar nahin

kisi ki luT ke rahat KHushi nahin milti

KHizan ke hath mein sarmaya-e-bahaar nahin

nigah-e-dost ko is ki bhi hai KHabar lekin

wo raaz jis ka abhi dil bhi raazdar nahin

tawajja-e-nigah-e-yar ka sabab ma'lum

dil-e-girafta-e-'mulla' abhi shikar nahin