ab bhi uski yaad aakar dil ko taDpa jae hai

ab bhī us kī yaad aakar dil ko taḌpā jaa.e hai

yuuñ bhulāne se kahīñ us but ko bhūlā jaa.e hai

aur gahre ho rahe haiñ ahd-e-māzī ke nuqūsh

dil kā har ik zaḳhm ab nāsūr bantā jaa.e hai

ḳhud-baḳhud ik huuk uThtī hai taḌap jaatā hai dil

jaan kar ai dost varna kis se taḌpā jaa.e hai

haal dil kā ab to sūrat se ayaañ hone lagā

jis ko dekho muñh mirā hairat se taktā jaa.e hai

ab to hai tark-e-tamannā hī ġham-e-dil kā ilaaj

in tamannāoñ se dil kā dard baḌhtā jaa.e hai

pās-e-ḳhātir hai kahūñ kyā apne chāra-sāz se

baḌh rahī hai Tiis jitnā zaḳhm bhartā jaa.e hai

jaam milte haiñ 'shifā' ko un kī chashm-e-mast se

laġhzisheñ hotī to haiñ lekin sañbhaltā jaa.e hai

ab bhi us ki yaad aakar dil ko taDpa jae hai

yun bhulane se kahin us but ko bhula jae hai

aur gahre ho rahe hain ahd-e-mazi ke nuqush

dil ka har ek zaKHm ab nasur banta jae hai

KHud-baKHud ek huk uThti hai taDap jata hai dil

jaan kar ai dost warna kis se taDpa jae hai

haal dil ka ab to surat se ayan hone laga

jis ko dekho munh mera hairat se takta jae hai

ab to hai tark-e-tamanna hi gham-e-dil ka ilaj

in tamannaon se dil ka dard baDhta jae hai

pas-e-KHatir hai kahun kya apne chaara-saz se

baDh rahi hai Tis jitna zaKHm bharta jae hai

jam milte hain 'shifa' ko un ki chashm-e-mast se

laghzishen hoti to hain lekin sanbhalta jae hai