ab dusri hasrat koi pali nahin jati

ab dūsrī hasrat koī paalī nahīñ jaatī

tasvīr tirī dil se nikālī nahīñ jaatī

kyā aap bhī rote ho mirī yaad meñ shab bhar

kyā aap kī āñkhoñ se bhī laalī nahīñ jaatī

gustāḳhiyāñ ho jaatī haiñ insān se maanā

rishtoñ pe magar ḳhaak to Daalī nahīñ jaatī

ye soch le zālim tū sitam karne se pahle

ek aah bhī mazlūm kī ḳhālī nahīñ jaatī

jo dekh le ik baar madīne kā nazāra

phir zehn se roze kī vo jaalī nahīñ jaatī

jin bachchoñ ko paalā thā baḌe naaz se maañ ne

maañ aaj 'jamāl' un se hī paalī nahīñ jaatī

ek phāñs 'jamāl' aisī mire dil meñ chubhī hai

jo chāragaroñ se bhī nikālī nahīñ jaatī

ab dusri hasrat koi pali nahin jati

taswir teri dil se nikali nahin jati

kya aap bhi rote ho meri yaad mein shab bhar

kya aap ki aankhon se bhi lali nahin jati

gustaKHiyan ho jati hain insan se mana

rishton pe magar KHak to Dali nahin jati

ye soch le zalim tu sitam karne se pahle

ek aah bhi mazlum ki KHali nahin jati

jo dekh le ek bar madine ka nazara

phir zehn se roze ki wo jali nahin jati

jin bachchon ko pala tha baDe naz se man ne

man aaj 'jamal' un se hi pali nahin jati

ek phans 'jamal' aisi mere dil mein chubhi hai

jo chaaragaron se bhi nikali nahin jati