ab gham ka mudawa kya hoga ab dard ka darman kya hoga

ab ġham kā mudāvā kyā hogā ab dard kā darmāñ kyā hogā

jab bazm-e-tamannā suunī ho phir jashn-e-charāġhāñ kyā hogā

phūloñ ko masal jaane vaalo kyā tum ne kabhī ye sochā hai

jab daur-e-ḳhizāñ aa jā.egā anjām-e-gulistāñ kyā hogā

the chand nasheman ke tinke jal jal kar jo hue ḳhākistar

ai barq-e-tapāñ is se baḌh kar ab hashr kā sāmāñ kyā hogā

ye soch ke ham tūfānoñ se har mauj-e-talātum se uljhe

sāhil pe khaḌe rahne se ab andāza-e-tūfāñ kyā hogā

ab jān-e-tamannā kī ḳhātir dīvāna kaho yā saudā.ī

ai josh-e-junūñ galiyoñ galiyoñ phirtā huuñ pareshāñ kyā hogā

mahloñ meñ ujāle har-sū haiñ kuTiyoñ meñ añdhere phaile haiñ

tārīkī-e-qismat kā ronā ai sham-e-farozāñ kyā hogā

har gaam pe qātil milte haiñ har gaam pe lāsheñ miltī haiñ

be-gor-o-kafan in lāshoñ kā ai aaj ke insāñ kyā hogā

ye soch-samajh lenā pahle ham ko jo miTānā maqsad hai

jab ham na raheñge tere liye phir gardish-e-daurāñ kyā hogā

taḳhrīb ho jin kā tarz-e-amal har haath meñ jin ke patthar hoñ

kuchh aise anāsir se 'nayyar' ta.amīr kā sāmāñ kyā hogā

ab gham ka mudawa kya hoga ab dard ka darman kya hoga

jab bazm-e-tamanna suni ho phir jashn-e-charaghan kya hoga

phulon ko masal jaane walo kya tum ne kabhi ye socha hai

jab daur-e-KHizan aa jaega anjam-e-gulistan kya hoga

the chand nasheman ke tinke jal jal kar jo hue KHakistar

ai barq-e-tapan is se baDh kar ab hashr ka saman kya hoga

ye soch ke hum tufanon se har mauj-e-talatum se uljhe

sahil pe khaDe rahne se ab andaza-e-tufan kya hoga

ab jaan-e-tamanna ki KHatir diwana kaho ya saudai

ai josh-e-junun galiyon galiyon phirta hun pareshan kya hoga

mahlon mein ujale har-su hain kuTiyon mein andhere phaile hain

tariki-e-qismat ka rona ai sham-e-farozan kya hoga

har gam pe qatil milte hain har gam pe lashen milti hain

be-gor-o-kafan in lashon ka ai aaj ke insan kya hoga

ye soch-samajh lena pahle hum ko jo miTana maqsad hai

jab hum na rahenge tere liye phir gardish-e-dauran kya hoga

taKHrib ho jin ka tarz-e-amal har hath mein jin ke patthar hon

kuchh aise anasir se 'nayyar' tamir ka saman kya hoga