ab hamein teri tamanna nahin hai

ab hameñ terī tamannā nahīñ hai

aañkh ko zauq-e-tamāshā nahīñ hai

jaane kyuuñ DhūñD rahe haiñ ham tum

vo jo taqdīr meñ likkhā nahīñ hai

yuuñ sar-e-rāhguzar baiThe haiñ

jaise ham ko kahīñ jaanā nahīñ hai

phir ye kyoñ ḳhaak sī uḌtī hai yahāñ

dil ke andar koī sahrā nahīñ hai

shahr vaalo kabhī us ko bhī paḌho

vo jo dīvār pe likkhā nahīñ hai

us ko kamtar na samajhnā logo

vo jise ḳhvāhish-e-duniyā nahīñ hai

ham ko hai qurb-e-mayassar kā nasha

ham ko andesha-e-fardā nahīñ hai

ye guzartā huā ik sāya-e-vaqt

qātil-e-umr hai lamha nahīñ hai

tah meñ rishtoñ kī utar kar dekho

kaun is dahr meñ tanhā nahīñ hai

hijr kā tujh ko hai shikva tū ne

ma.anī-e-ishq ko samjhā nahīñ hai

gum hue kitne hī be-nām shahīd

jin kā tārīḳh meñ charchā nahīñ hai

tū hai begāna to kyā tujh se gila

koī duniyā meñ kisī kā nahīñ hai

kar ga.e ḳhauf-e-ḳhizāñ se hijrat

peḌ par koī parinda nahīñ hai

ziist meñ ham ne bachā kar kuchh vaqt

kabhī apne liye rakkhā nahīñ hai

ham haiñ us ahd meñ zinda jis kā

jism hī jism hai chehra nahīñ hai

tum na hoge to jiyeñge kaise

abhī is baare meñ sochā nahīñ hai

kaisī mahfil ye sajī hai 'nāzish'

koī bhī merā shanāsā nahīñ hai

ab hamein teri tamanna nahin hai

aankh ko zauq-e-tamasha nahin hai

jaane kyun DhunD rahe hain hum tum

wo jo taqdir mein likkha nahin hai

yun sar-e-rahguzar baiThe hain

jaise hum ko kahin jaana nahin hai

phir ye kyon KHak si uDti hai yahan

dil ke andar koi sahra nahin hai

shahr walo kabhi us ko bhi paDho

wo jo diwar pe likkha nahin hai

us ko kamtar na samajhna logo

wo jise KHwahish-e-duniya nahin hai

hum ko hai qurb-e-mayassar ka nasha

hum ko andesha-e-farda nahin hai

ye guzarta hua ek saya-e-waqt

qatil-e-umr hai lamha nahin hai

tah mein rishton ki utar kar dekho

kaun is dahr mein tanha nahin hai

hijr ka tujh ko hai shikwa tu ne

mani-e-ishq ko samjha nahin hai

gum hue kitne hi be-nam shahid

jin ka tariKH mein charcha nahin hai

tu hai begana to kya tujh se gila

koi duniya mein kisi ka nahin hai

kar gae KHauf-e-KHizan se hijrat

peD par koi parinda nahin hai

zist mein hum ne bacha kar kuchh waqt

kabhi apne liye rakkha nahin hai

hum hain us ahd mein zinda jis ka

jism hi jism hai chehra nahin hai

tum na hoge to jiyenge kaise

abhi is bare mein socha nahin hai

kaisi mahfil ye saji hai 'nazish'

koi bhi mera shanasa nahin hai