ab har ek KHair mein maujud hai shar ki surat

ab har ik ḳhair meñ maujūd hai shar kī sūrat

bā.is-e-faḳhr huā aib hunar kī sūrat

miltī-jultī hai khañDar se mire ghar kī sūrat

chhat hai añgnā.ī sī dīvār hai dar kī sūrat

zindagī ḳhatm huī aur ye hasrat hī rahī

dil kī qīmat bhī lagātā koī sar kī sūrat

raah takte haiñ ki guzregā idhar se koī

aur āñkheñ haiñ ki haiñ sham-e-sahar kī sūrat

tum mirī zaat se māyūs na honā hargiz

maiñ dabī raakh se ubhrūñgā sharar kī sūrat

hijr meñ ham pe jo guzre hai bayāñ se hai ba.iid

kaash ye ho ki udhar bhī ho idhar kī sūrat

ham to is darja mohazzab bhī na the ai 'afzal'

aise nikle the ki phir dekhī na ghar kī sūrat

ab har ek KHair mein maujud hai shar ki surat

bais-e-faKHr hua aib hunar ki surat

milti-julti hai khanDar se mere ghar ki surat

chhat hai angnai si diwar hai dar ki surat

zindagi KHatm hui aur ye hasrat hi rahi

dil ki qimat bhi lagata koi sar ki surat

rah takte hain ki guzrega idhar se koi

aur aankhen hain ki hain sham-e-sahar ki surat

tum meri zat se mayus na hona hargiz

main dabi rakh se ubhrunga sharar ki surat

hijr mein hum pe jo guzre hai bayan se hai baid

kash ye ho ki udhar bhi ho idhar ki surat

hum to is darja mohazzab bhi na the ai 'afzal'

aise nikle the ki phir dekhi na ghar ki surat