ab hasti-e-KHarab ka aalam sanwar gaya

ab hastī-e-ḳharāb kā aalam sañvar gayā

ik nashsha-e-shabāb thā sar se utar gayā

guzrā huuñ rāh-e-ishq meñ manzil se be-niyāz

āvāz un kī paa.ī jahāñ bhī Thahar gayā

muḌ muḌ ke dekhte haiñ mujhe rahguzar pe log

maiñ dekhtā huuñ zo.am-e-mohabbat kidhar gayā

qadmoñ ko us ke chhūtā hai ḳhud maqsad-e-hayāt

jo manzil-e-nashāt kī had se guzar gayā

anjām-e-ishq dekh rahā huuñ 'nazar' se aaj

maiñ be-ḳhudī meñ apne hī saa.e se Dar gayā

ab hasti-e-KHarab ka aalam sanwar gaya

ek nashsha-e-shabab tha sar se utar gaya

guzra hun rah-e-ishq mein manzil se be-niyaz

aawaz un ki pai jahan bhi Thahar gaya

muD muD ke dekhte hain mujhe rahguzar pe log

main dekhta hun zoam-e-mohabbat kidhar gaya

qadmon ko us ke chhuta hai KHud maqsad-e-hayat

jo manzil-e-nashat ki had se guzar gaya

anjam-e-ishq dekh raha hun 'nazar' se aaj

main be-KHudi mein apne hi sae se Dar gaya