ab hawas ke Khaar hain is ishq ke gul-dan mein

ab havas ke ḳhaar haiñ is ishq ke gul-dān meñ

dard ke gul sūkhte haiñ 'mīr' ke dīvān meñ

dostī kā girya hai ki dostoñ kī talḳh baat

bhuul jaao dafn kar ke dil ke qabristān meñ

eḌiyāñ kyā apne sar ko bhī ragaḌ leñ ham agar

ab kabhī zamzam nahīñ niklegā registān meñ

sust-rau logoñ ko nākāmī milī aksar magar

tez chal kar bhī bahut se log haiñ nuqsān meñ

apnī chhat par amn ke panchhī ko daana kaun de

log saare jā chuke haiñ jang ke maidān meñ

kuchh na fariyādeñ suneñ ki hai election phir qarīb

rahnumāoñ se kaho ab tel Dāleñ kaan meñ

ishq meñ dil hārne ko ik zamāna ho gayā

aur ab tak de rahe haiñ ashk ham tāvān meñ

terī har ik baat ab bhī yaad aatī hai mujhe

log to kahte the maiñ huuñ mubtalā nisyān meñ

ab hawas ke KHar hain is ishq ke gul-dan mein

dard ke gul sukhte hain 'mir' ke diwan mein

dosti ka girya hai ki doston ki talKH baat

bhul jao dafn kar ke dil ke qabristan mein

eDiyan kya apne sar ko bhi ragaD len hum agar

ab kabhi zamzam nahin niklega registan mein

sust-rau logon ko nakaami mili aksar magar

tez chal kar bhi bahut se log hain nuqsan mein

apni chhat par amn ke panchhi ko dana kaun de

log sare ja chuke hain jang ke maidan mein

kuchh na fariyaaden sunen ki hai election phir qarib

rahnumaon se kaho ab tel Dalen kan mein

ishq mein dil haarne ko ek zamana ho gaya

aur ab tak de rahe hain ashk hum tawan mein

teri har ek baat ab bhi yaad aati hai mujhe

log to kahte the main hun mubtala nisyan mein