ab is aah-o-fughan se ai dil-e-nakaam kya hoga

ab is āh-o-fuġhāñ se ai dil-e-nākām kyā hogā

ye pahle sochnā thā ishq kā anjām kyā hogā

bajā.e dil nazar aatā hai ik sho.ala sā pahlū meñ

ye āġhāz-e-mohabbat hai to phir anjām kyā hogā

hujūm-e-ġham se ghabrā kar maiñ apnī jaan to de duuñ

magar terā batā ai gardish-e-ayyām kyā hogā

ḳhudāyā aaj mere zabt-e-ġham kī laaj rah jaa.e

sahar hī jab qayāmat hai to phir tā-shām kyā hogā

'ziyā' ye daūr-e-āzādī sunahrā hī sahī lekin

hameñ ma.alūm hai is daur kā anjām kyā hogā

ab is aah-o-fughan se ai dil-e-nakaam kya hoga

ye pahle sochna tha ishq ka anjam kya hoga

bajae dil nazar aata hai ek shoala sa pahlu mein

ye aaghaz-e-mohabbat hai to phir anjam kya hoga

hujum-e-gham se ghabra kar main apni jaan to de dun

magar tera bata ai gardish-e-ayyam kya hoga

KHudaya aaj mere zabt-e-gham ki laj rah jae

sahar hi jab qayamat hai to phir ta-sham kya hoga

'ziya' ye daur-e-azadi sunahra hi sahi lekin

hamein malum hai is daur ka anjam kya hoga