ab is qadar bhi badal jaega KHabar nahin thi

ab is qadar bhī badal jā.egā ḳhabar nahīñ thī

fanā se duur nikal jā.egā ḳhabar nahīñ thī

mire badan kī harārat utārne vaalā

mirī tapish se pighal jā.egā ḳhabar nahīñ thī

vo ibtidā-e-mohabbat ke pahle lamhe ko

banā ke āḳhirī pal jā.egā ḳhabar nahīñ thī

baḌhegī luqma-e-dil se bhī aage us kī havas

ye nafs tan ko nigal jā.egā ḳhabar nahīñ thī

gilā thā ātish-e-nok-e-qalam se kāġhaz ko

magar siyāhī se jal jā.egā ḳhabar nahīñ thī

samajh rahe the jise naqsh-bar-sarāb kabhī

vo mauj ban ke uchhal jā.egā ḳhabar nahīñ thī

bahut thā sāya-e-abr-e-ġhubār-e-dasht magar

zarā sī der meñ Dhal jā.egā ḳhabar nahīñ thī

ye sañg-e-ḳhvāb 'shafaq' aañkh ke pasīne par

kisī bhī vaqt phisal jā.egā ḳhabar nahīñ thī

ab is qadar bhi badal jaega KHabar nahin thi

fana se dur nikal jaega KHabar nahin thi

mere badan ki hararat utarne wala

meri tapish se pighal jaega KHabar nahin thi

wo ibtida-e-mohabbat ke pahle lamhe ko

bana ke aaKHiri pal jaega KHabar nahin thi

baDhegi luqma-e-dil se bhi aage us ki hawas

ye nafs tan ko nigal jaega KHabar nahin thi

gila tha aatish-e-nok-e-qalam se kaghaz ko

magar siyahi se jal jaega KHabar nahin thi

samajh rahe the jise naqsh-bar-sarab kabhi

wo mauj ban ke uchhal jaega KHabar nahin thi

bahut tha saya-e-abr-e-ghubar-e-dasht magar

zara si der mein Dhal jaega KHabar nahin thi

ye sang-e-KHwab 'shafaq' aankh ke pasine par

kisi bhi waqt phisal jaega KHabar nahin thi