ab is qadar bhi to be-abru na samjha jae

ab is qadar bhī to be-ābrū na samjhā jaa.e

ki aarzū ko mirī aarzū na samjhā jaa.e

tumhārī yaad kā har zaḳhm ristā rahtā hai

maiñ bā-vuzū huuñ magar bā-vazū na samjhā jaa.e

maiñ apne aap se ḳhalvat meñ baat kartā huuñ

ise maraz ai mere chāra-jū na samjhā jaa.e

vo apnā aks agar mujh meñ dekh hī na sake

to aa.ine ko mire rū-ba-rū na samjhā jaa.e

maiñ sirf suntā huuñ aur sirf boltā vo hai

ise ḳhudā ke liye guftugū na samjhā jaa.e

ye ek roz koī inqalāb lā.egā

mirā lahū hai use bas lahū na samjhā jaa.e

bhaTak rahā hai agar dil namāz meñ to miyāñ

jo qibla-rū hai use qibla-rū na samjhā jaa.e

ab is qadar bhi to be-abru na samjha jae

ki aarzu ko meri aarzu na samjha jae

tumhaari yaad ka har zaKHm rista rahta hai

main ba-wuzu hun magar ba-wazu na samjha jae

main apne aap se KHalwat mein baat karta hun

ise maraz ai mere chaara-ju na samjha jae

wo apna aks agar mujh mein dekh hi na sake

to aaine ko mere ru-ba-ru na samjha jae

main sirf sunta hun aur sirf bolta wo hai

ise KHuda ke liye guftugu na samjha jae

ye ek roz koi inqalab laega

mera lahu hai use bas lahu na samjha jae

bhaTak raha hai agar dil namaz mein to miyan

jo qibla-ru hai use qibla-ru na samjha jae