ab is se milne ki ummid kya guman bhi nahin

ab is se milne kī ummīd kyā gumāñ bhī nahīñ

zamīñ ga.ī to ga.ī sar pe āsmāñ bhī nahīñ

bujhā bujhā sā hai dil kā alaav barsoñ se

kisī kī yaad kā āñkhoñ meñ ab dhuāñ bhī nahīñ

na.ī sadī ke safar meñ bhī ham akele haiñ

havā ke dosh pe ḳhushbū kā kārvāñ bhī nahīñ

tumhīñ batāo yahāñ kis tarah ji.eñ ham log

tumhāre shahr meñ ġhazloñ kī ik dukāñ bhī nahīñ

gharoñ meñ sahm ke baiThe hue haiñ sab bachche

samundaroñ pe kahīñ ret kā makāñ bhī nahīñ

is ehtiyāt se āñkhoñ meñ kaun aayā thā

subūt ke liye palkoñ pe ik nishāñ bhī nahīñ

ik aise raaz kī mānind jī rahā huuñ 'shakīl'

ki jis kā mere sivā koī rāz-dāñ bhī nahīñ

ab is se milne ki ummid kya guman bhi nahin

zamin gai to gai sar pe aasman bhi nahin

bujha bujha sa hai dil ka alaw barson se

kisi ki yaad ka aankhon mein ab dhuan bhi nahin

nai sadi ke safar mein bhi hum akele hain

hawa ke dosh pe KHushbu ka karwan bhi nahin

tumhin batao yahan kis tarah jien hum log

tumhaare shahr mein ghazlon ki ek dukan bhi nahin

gharon mein sahm ke baiThe hue hain sab bachche

samundaron pe kahin ret ka makan bhi nahin

is ehtiyat se aankhon mein kaun aaya tha

subut ke liye palkon pe ek nishan bhi nahin

ek aise raaz ki manind ji raha hun 'shakil'

ki jis ka mere siwa koi raaz-dan bhi nahin