ab is se pahle ki tan man lahu lahu ho jae

ab is se pahle ki tan man lahū lahū ho jaa.e

lahū se qabl-e-shahādat chalo vazū ho jaa.e

qarīb-e-dīda-o-dil is qadar jo tū ho jaa.e

to kyā ajab tirī tārīf meñ ġhulū ho jaa.e

bhale hī hotī hai duniyā tamām hū ho jaa.e

ḳhudā-na-ḳhvāsta mere ḳhilāf tū ho jaa.e

maiñ apnā phone kabhī band hī nahīñ rakhtā

na jaane kab use taufīq-e-guftugū ho jaa.e

tumhārī chashm-e-karam hī se hai bharam dil kā

vo din na aa.e ki ye jaam be-subū ho jaa.e

mile mile na mile fursat o farāġhat phir

chalo yahīñ kahīñ kuchh der hā-o-hū ho jaa.e

dimāġh us kā sunā hai ki āsmān pe hai

mirī zamīn pe chal kar lahū lahū ho jaa.e

ra.uuf 'ḳhair' kisī par kabhī nahīñ khulnā

jo aaj yaar hai mumkin hai kal udū ho jaa.e

ab is se pahle ki tan man lahu lahu ho jae

lahu se qabl-e-shahadat chalo wazu ho jae

qarib-e-dida-o-dil is qadar jo tu ho jae

to kya ajab teri tarif mein ghulu ho jae

bhale hi hoti hai duniya tamam hu ho jae

KHuda-na-KHwasta mere KHilaf tu ho jae

main apna phone kabhi band hi nahin rakhta

na jaane kab use taufiq-e-guftugu ho jae

tumhaari chashm-e-karam hi se hai bharam dil ka

wo din na aae ki ye jam be-subu ho jae

mile mile na mile fursat o faraghat phir

chalo yahin kahin kuchh der ha-o-hu ho jae

dimagh us ka suna hai ki aasman pe hai

meri zamin pe chal kar lahu lahu ho jae

rauf 'KHair' kisi par kabhi nahin khulna

jo aaj yar hai mumkin hai kal udu ho jae