ab jam hamara hai dil-aram hamara

ab jaam hamārā hai dil-ārām hamārā

muñh dekhtī hai gardish-e-ayyām hamārā

hasrat-zada-e-shauq hai ummīd hamārī

mahrūm-e-tamannā dil-e-nākām hamārā

ham to haiñ kahīñ jalva-gāh-e-nāz kahīñ aur

ik manzil-e-dushvār hai har-gām hamārā

ham aur shabistān-e-adū muft kī tohmat

kahte haiñ ki hogā koī hamnām hamārā

mahshar meñ hue jab ḳhat-e-a.amāl ke TukḌe

un shoḳh hasīnoñ meñ bikā naam hamārā

sāġhar jo liyā haath meñ aañsū nikal aa.e

rindoñ kī zabānoñ pe rahā naam hamārā

kyā qahr thī yā-rab nigah-e-nāz kī shoḳhī

chuTkī meñ uḌā le ga.ī ārām hamārā

'nāzish' koī jī chhoḌ gayā shauq-e-sitam se

rusvā.ī-e-ulfat meñ huā naam hamārā

ab jam hamara hai dil-aram hamara

munh dekhti hai gardish-e-ayyam hamara

hasrat-zada-e-shauq hai ummid hamari

mahrum-e-tamanna dil-e-nakaam hamara

hum to hain kahin jalwa-gah-e-naz kahin aur

ek manzil-e-dushwar hai har-gam hamara

hum aur shabistan-e-adu muft ki tohmat

kahte hain ki hoga koi hamnam hamara

mahshar mein hue jab KHat-e-amal ke TukDe

un shoKH hasinon mein bika nam hamara

saghar jo liya hath mein aansu nikal aae

rindon ki zabanon pe raha nam hamara

kya qahr thi ya-rab nigah-e-naz ki shoKHi

chuTki mein uDa le gai aaram hamara

'nazish' koi ji chhoD gaya shauq-e-sitam se

ruswai-e-ulfat mein hua nam hamara