ab jo dena hai mere dost mohabbat dena

ab jo denā hai mire dost mohabbat denā

yuuñ bhī achchhā nahīñ hotā hai aziyyat denā

ab tirī baat koī mujh ko bhalī lagtī nahīñ

chhoḌtā kyoñ nahīñ tū yaar nasīhat denā

gar mujhe denā ho idrāk-e-taġhazzul kā nisāb

mere maulā mujhe sau saal kī ḳhalvat denā

maiñ tire lutf-o-‘ināyāt kā haamī to nahīñ

ho sake to mujhe jaane kī ijāzat denā

rasm-e-dīvāngī kī ek adā ye bhī hai

zaḳhm-e-tāza ko na bharne kī suhūlat denā

ab koī aur na yūsuf bane farzand-e-chāh

banī-yā'qūb ko thoḌī sī muravvat denā

'ishq vo qaid-e-masarrat hai ki har lamha 'ayāz'

dil ye kahtā hai ye zanjīr haTā mat denā

ab jo dena hai mere dost mohabbat dena

yun bhi achchha nahin hota hai aziyyat dena

ab teri baat koi mujh ko bhali lagti nahin

chhoDta kyon nahin tu yar nasihat dena

gar mujhe dena ho idrak-e-taghazzul ka nisab

mere maula mujhe sau sal ki KHalwat dena

main tere lutf-o-‘inayat ka hami to nahin

ho sake to mujhe jaane ki ijazat dena

rasm-e-diwangi ki ek ada ye bhi hai

zaKHm-e-taza ko na bharne ki suhulat dena

ab koi aur na yusuf bane farzand-e-chah

bani-ya'qub ko thoDi si murawwat dena

'ishq wo qaid-e-masarrat hai ki har lamha 'ayaz'

dil ye kahta hai ye zanjir haTa mat dena