ab kahan un ka hasin sath chalo so jaen

ab kahāñ un kā hasīñ saath chalo so jaa.eñ

phīkī phīkī hai har ik raat chalo so jaa.eñ

muntaqil kar deñ dil-o-zehn kahīñ aur apne

jaan le leñ na ye sadmāt chalo so jaa.eñ

hijr kī shab to yūñhī jāgte guzrī saarī

ab sahar se hai mulāqāt chalo so jaa.eñ

mausam-e-gul meñ bhī ab so.e hue rahte haiñ

ab kahāñ yaar vo jazbāt chalo so jaa.eñ

ab koī aur bharam apnā rahā na qaa.em

khā chuke un se bhī ab maat chalo so jaa.eñ

hukmarānī jahāñ phūloñ kī rahā kartī thī

aaj kāñToñ kī hai bārāt chalo so jaa.eñ

kar rahe haiñ mujhe zyāda hī pareshāñ har pal

zindagī ab tire ḳhadshāt chalo so jaa.eñ

abr-ālūd fazā ho ga.ī shaffāf 'anjum'

ho chukī āñkhoñ se barsāt chalo so jaa.eñ

ab kahan un ka hasin sath chalo so jaen

phiki phiki hai har ek raat chalo so jaen

muntaqil kar den dil-o-zehn kahin aur apne

jaan le len na ye sadmat chalo so jaen

hijr ki shab to yunhi jagte guzri sari

ab sahar se hai mulaqat chalo so jaen

mausam-e-gul mein bhi ab soe hue rahte hain

ab kahan yar wo jazbaat chalo so jaen

ab koi aur bharam apna raha na qaem

kha chuke un se bhi ab mat chalo so jaen

hukmarani jahan phulon ki raha karti thi

aaj kanTon ki hai baraat chalo so jaen

kar rahe hain mujhe zyaada hi pareshan har pal

zindagi ab tere KHadshat chalo so jaen

abr-alud faza ho gai shaffaf 'anjum'

ho chuki aankhon se barsat chalo so jaen