ab ke sauda to mere sar se bahut aage tha

ab ke saudā to mire sar se bahut aage thā

kyā irāda kisī patthar se bahut aage thā

aap ko kaise ḳhabar ho ga.ī jalne kī mire

aap kā ghar to mire ghar se bahut aage thā

vo to kahiye ki nigāheñ nahīñ lauTīñ varna

ek manzar pas-e-manzar se bahut aage thā

aap ne pyaas kī shiddat nahīñ dekhī varna

ek ik qatra samundar se bahut aage thā

jaane kis vādī-e-ḳhāmosh meñ rū-posh huā

haañ vahī shaḳhs jo lashkar se bahut aage thā

ik ajab Dar mirī rag rag meñ samāyā thā 'shamīm'

ek ehsās magar Dar se bahut aage thā

ab ke sauda to mere sar se bahut aage tha

kya irada kisi patthar se bahut aage tha

aap ko kaise KHabar ho gai jalne ki mere

aap ka ghar to mere ghar se bahut aage tha

wo to kahiye ki nigahen nahin lauTin warna

ek manzar pas-e-manzar se bahut aage tha

aap ne pyas ki shiddat nahin dekhi warna

ek ek qatra samundar se bahut aage tha

jaane kis wadi-e-KHamosh mein ru-posh hua

han wahi shaKHs jo lashkar se bahut aage tha

ek ajab Dar meri rag rag mein samaya tha 'shamim'

ek ehsas magar Dar se bahut aage tha