ab ke to gulistan mein wo daur-e-bahaar aaya

ab ke to gulistāñ meñ vo daur-e-bahār aayā

phūloñ pe udāsī hai kāñToñ pe nikhār aayā

vo apne muqaddar pe rotā hī rahā barsoñ

auroñ kā muqaddar jo pal bhar meñ sañvār aayā

kyā chaal chalī tū ne kyā jaal bichhāyā hai

sayyād mubārak ho ghar baiThe shikār aayā

jis jiit kī ḳhātir maiñ bedār rahā ab tak

ik lamhe kī ġhaflat meñ vo jiit bhī haar aayā

dīvāngī-e-dil kā kyā arz karūñ aalam

maiñ dard ke sahrā meñ ḳhud ko hī pukār aayā

har haal meñ hai mujh ko manzūr ḳhushī un kī

rusvā.ī huī merī un ko to qarār aayā

iflās meñ ghuT ghuT kar dam toḌ diyā jis ne

aaj us pe zamāne kī nafrat ko bhī pyaar aayā

sach kahtā huuñ maiñ 'arshad' aisā bhī huā aksar

ḳhud apnī masarrat pe royā to qarār aayā

ab ke to gulistan mein wo daur-e-bahaar aaya

phulon pe udasi hai kanTon pe nikhaar aaya

wo apne muqaddar pe rota hi raha barson

auron ka muqaddar jo pal bhar mein sanwar aaya

kya chaal chali tu ne kya jal bichhaya hai

sayyaad mubarak ho ghar baiThe shikar aaya

jis jit ki KHatir main bedar raha ab tak

ek lamhe ki ghaflat mein wo jit bhi haar aaya

diwangi-e-dil ka kya arz karun aalam

main dard ke sahra mein KHud ko hi pukar aaya

har haal mein hai mujh ko manzur KHushi un ki

ruswai hui meri un ko to qarar aaya

iflas mein ghuT ghuT kar dam toD diya jis ne

aaj us pe zamane ki nafrat ko bhi pyar aaya

sach kahta hun main 'arshad' aisa bhi hua aksar

KHud apni masarrat pe roya to qarar aaya