ab KHana-e-dil mein jo makin hai wo nahin hai

ab ḳhāna-e-dil meñ jo makīñ hai vo nahīñ hai

tū soch rahā hai vo yahīñ hai vo nahīñ hai

ai dil tujhe kis tarh maiñ samjhā.ūñ ki tujh ko

jis shaḳhs ke hone kā yaqīñ hai vo nahīñ hai

vo kufr kā 'ālam hai ki lagtā hai kabhī to

jo zaat rag-e-jāñ se qarīñ hai vo nahīñ hai

kyā is pe kaheñ ḳhud ko ki ik 'arse se jis kī

naqsh-e-kaf-e-pā par ye jabīñ hai vo nahīñ hai

kis tarh chalā jā.ūñ tirī ḳhuld meñ vā'iz

go Thiik hai ye ḳhuld-e-barīñ hai vo nahīñ hai

sad-haif ba-sad-nāz gañvāyā mujhe us ne

maiñ to ye samajhtā thā zahīñ hai vo nahīñ hai

kyūñkar nahīñ kartā tū ye taslīm haqīqat

ab vo tirī qismat meñ nahīñ hai vo nahīñ hai

'haidar' vo mirī jaan bahut duur hai tujh se

ab chhoḌ de kahnā vo yahīñ hai vo nahīñ hai

ab KHana-e-dil mein jo makin hai wo nahin hai

tu soch raha hai wo yahin hai wo nahin hai

ai dil tujhe kis tarh main samjhaun ki tujh ko

jis shaKHs ke hone ka yaqin hai wo nahin hai

wo kufr ka 'alam hai ki lagta hai kabhi to

jo zat rag-e-jaan se qarin hai wo nahin hai

kya is pe kahen KHud ko ki ek 'arse se jis ki

naqsh-e-kaf-e-pa par ye jabin hai wo nahin hai

kis tarh chala jaun teri KHuld mein wa'iz

go Thik hai ye KHuld-e-barin hai wo nahin hai

sad-haif ba-sad-naz ganwaya mujhe us ne

main to ye samajhta tha zahin hai wo nahin hai

kyunkar nahin karta tu ye taslim haqiqat

ab wo teri qismat mein nahin hai wo nahin hai

'haidar' wo meri jaan bahut dur hai tujh se

ab chhoD de kahna wo yahin hai wo nahin hai