ab KHayalon ka jahan aur na aabaad karen

ab ḳhayāloñ kā jahāñ aur na ābād kareñ

ḳhvāb jo bhuul chuke haiñ unheñ bas yaad kareñ

thapkī de de ke sulāne kī hai 'ādat dil ko

ab kisī aur se kyuuñ ḳhud hī se fariyād kareñ

kitne mausam ke chhalāve se guzar kar pahuñchī

us Dagar pe ki jahāñ log mujhe yaad kareñ

ham bhī ab fikr-e-jahāñ chhoḌ ke jī bhar hañs leñ

vaqt itnā bhī kahāñ hai jise barbād kareñ

zindagī yuuñ hī munazzam rahe aisā bhī nahīñ

ham na.ī tarz koī aur bhī ījād kareñ

dene vaale kī mashiyyat thī jo vahshat de dī

dil-e-vīrāñ jo milā hai use ābād kareñ

dil ke TuuTe hue TukḌoñ ko na joḌeñ 'shāhīn'

dil pe jo guzrī use bhuul ke mat yaad kareñ

ab KHayalon ka jahan aur na aabaad karen

KHwab jo bhul chuke hain unhen bas yaad karen

thapki de de ke sulane ki hai 'adat dil ko

ab kisi aur se kyun KHud hi se fariyaad karen

kitne mausam ke chhalawe se guzar kar pahunchi

us Dagar pe ki jahan log mujhe yaad karen

hum bhi ab fikr-e-jahan chhoD ke ji bhar hans len

waqt itna bhi kahan hai jise barbaad karen

zindagi yun hi munazzam rahe aisa bhi nahin

hum nai tarz koi aur bhi ijad karen

dene wale ki mashiyyat thi jo wahshat de di

dil-e-viran jo mila hai use aabaad karen

dil ke TuTe hue TukDon ko na joDen 'shahin'

dil pe jo guzri use bhul ke mat yaad karen