ab koi jor kisi taur na sahna hoga

ab koī jor kisī taur na sahnā hogā

jo bhī guzregī sar-e-dār use kahnā hogā

tiir ban kar maiñ kisī vaqt bhī chal jā.ūñgā

rif.atoñ ko had-e-mohtāt meñ rahnā hogā

us ke paanī meñ abhī ātish-e-tāsīr nahīñ

ashk-e-hasrat ko abhī aañkh meñ rahnā hogā

ahl-e-sāhil se kaho apnā mudāvā kar leñ

ab kināroñ pe bhī dariyāoñ ko bahnā hogā

umr bhar mere badan par thā bagūloñ kā libās

kisī rahrav ne ye malbūs na pahnā hogā

kisī majnūñ ko na ho ābla-pā.ī kā gilā

apnī auqāt meñ sahrāoñ ko rahnā hogā

maiñ guzarte hue lamhoñ kā shikārī huuñ 'zahīr'

zindagī ko mire fitrāk meñ rahnā hogā

ab koi jor kisi taur na sahna hoga

jo bhi guzregi sar-e-dar use kahna hoga

tir ban kar main kisi waqt bhi chal jaunga

rifaton ko had-e-mohtat mein rahna hoga

us ke pani mein abhi aatish-e-tasir nahin

ashk-e-hasrat ko abhi aankh mein rahna hoga

ahl-e-sahil se kaho apna mudawa kar len

ab kinaron pe bhi dariyaon ko bahna hoga

umr bhar mere badan par tha bagulon ka libas

kisi rahraw ne ye malbus na pahna hoga

kisi majnun ko na ho aabla-pai ka gila

apni auqat mein sahraon ko rahna hoga

main guzarte hue lamhon ka shikari hun 'zahir'

zindagi ko mere fitrak mein rahna hoga